“Ази, номхон далайн бүсийн агаарын тээврийг хялбаршуулах чуулга уулзалт 2025” арга хэмжээнд гаалийн байгууллагын төлөөлөл оролцож байна

Олон Улсын Иргэний Нисэхийн Байгууллага (ICAO) болон Монгол Улсын Засгийн газар хамтран 2025 оны 7 дугаар сарын 7, 8-ний өдрүүдэд “Ази, Номхон далайн бүсийн Агаарын тээврийг хялбаршуулах чуулга уулзалт 2025 (Facilitation Regional Forum 2025)-г Гадаад харилцааны яамны “Зөвшилцөл” танхимд зохион байгуулж байна.

Тус чуулга уулзалтаар бүс нутгийн 39 гишүүн орны төлөөлөгчдийг Улаанбаатар хотноо хүлээн авч, агаарын тээврийн хялбаршуулалтын үндэсний хөтөлбөр, хороодыг бэхжүүлэх, хил, гаалийн хяналт болон бүс нутгийн хамтын ажиллагааг гүнзгийрүүлэх, Нийтийн түлхүүрийн сан (PKD)-ийн хэрэгжилт, зорчигчийн мэдээллийн систем (API, PNR), НҮБ-ын CT TRAVEL хөтөлбөр, хиймэл оюун ухаан, автоматжуулалт, хил нэвтрэх шинэ технологийг нэвтрүүлэх, аюулгүй, үр ашигтай, уялдаа холбоотой агаарын тээврийн тогтолцоог дэмжих чухал талбарыг бүрдүүлэхээр зорьж буй юм.

Энэхүү арга хэмжээнд ГЕГ-ын дэд дарга Г.Энхтайван оролцож, “Бүс нутгийн хамтын ажиллагаа: Хилийн удирдлага, үйл ажиллагааг хялбаршуулах” сэдэвт хэлэлцүүлгийн хүрээнд “Олон улс, бүс нутаг, хоёр талт хамтын ажиллагаа; Гаалийн шинэчлэл; Мэдээллийн технологийн хөгжил; Хүндрэлтэй асуудал болон цаашид хэрэгжүүлэх арга хэмжээ”-ний талаар танилцууллаа.

Оролцогчид олон төрлийн мэдээлэл агуулсан, товч тодорхой, сайн туршлага бүхий илтгэл тавьсанд талархал илэрхийлж, ГЕГ-ын олон улсын хамтын ажиллагаа, түүний дотор “Дэлхийн гаалийн байгууллага” агаарын тээврийн хөдөлгөөнд хэрхэн хяналт тавьж байгаа талаар асуулт асууж, дэлгэрэнгүй хариулт хүлээн авсан байна. Хэлэлцүүлгийн дараа модератор хуралдааныг дүгнэж хэлсэн үгэндээ “Гаалийн байгууллага агаарын тээврийн хөдөлгөөнд гол үүрэгтэй оролцох тул далайд гарцгүй Монгол Улсын Гаалийн байгууллагын өнөөгийн хэрэгжүүлж буй туршлага дэлхийн бусад улс орон, бүс нутаг, олон улсад хамтран ажиллах боломж бүрдсэн” гэдгийг онцоллоо.