Гаалийн байгууллага НҮБ-ын Аюулгүйн зөвлөлийн 1540 тогтоолын хүрээнд хяналт, шалгалтыг сайжруулах чиглэлээр чадавхиа бэхжүүллээ
Европын холбооны “COARM Outreach 7”, “P2P P105” төслийн хүрээнд ХБНГУ-ын Эдийн засаг, Экспортын хяналтын байгууллага (BAFA) болон Монгол Улсын Терроризмтой тэмцэх зөвлөл хамтран “Монгол Улс дахь стратегийн худалдааны хяналтын хууль эрх зүйн орчин, экспортын барааны тусгай зөвшөөрөл олгох үйл ажиллагаа, түүний хэрэгжилтийг хангуулах асуудал” сэдэвт семинарыг Улаанбаатар хотноо энэ сарын 23-наас 25-ны өдрүүдэд зохион байгууллаа.
Тус семинарт Монгол Улсын Терроризмтэй тэмцэх зөвлөл, Эдийн засаг хөгжлийн яам, Уул уурхай, хүнд үйлдвэрийн яам, Монгол банк, Тагнуулын ерөнхий газар, Гаалийн ерөнхий газар, Эм, эмнэлгийн хэрэгслийн хяналт зохицуулалтын газар, Хил хамгаалах ерөнхий газар, Зэвсэгт хүчний жанжин штаб зэрэг байгууллагуудын 25 төлөөлөгч хамрагдсанаас гаалийн байгууллагыг төлөөлж гаалийн ерөнхий газрын дэд дарга Г.Энхтайван болон холбогдох чиглэлийн нийт 8 албан хаагч оролцож, өнөөгийн нөхцөл байдлын талаар илтгэл танилцууллаа.
Гурван өдөр үргэлжилсэн энэхүү семинарын хүрээнд Монгол Улсад хоёрдмол зориулалттай бараа, бүтээгдэхүүний экспортын хяналтын тогтолцоог бүрдүүлэхэд тулгамдаж буй асуудал болох тусгай зөвшөөрөл олгох, хяналтын жагсаалт ашиглах, эцсийн хэрэглэгчийг тодорхойлох, эрсдэлийн үнэлгээ хийх, мэдээлэл солилцох, байгууллага хоорондын хамтын ажиллагааг бэхжүүлэх зэрэг сэдвээр олон улсын туршлага, практик жишээнд тулгуурлан экспортын хяналт хэрэгжүүлэх чиг үүрэг бүхий байгууллагуудын төлөөлөлд тодорхой ойлголт өгөх, хэлэлцүүлэг өрнүүлсэн байна.
“Терроризмтой тэмцэх зөвлөл”-ийн гишүүнээр ажилладаг гаалийн байгууллагын хувьд Европын холбооноос хэрэгжүүлж буй P2P төсөлд хамрагдан экспортын эрх зүйн орчныг бүрдүүлэх, хяналтын тогтолцоог бэхжүүлэх чиглэлд хамтран ажилладаг бөгөөд энэхүү хэлэлцүүлгээр дамжуулан НҮБ-ын Аюулгүйн зөвлөлийн 1540 тогтоолын хүрээнд хяналт, шалгалтыг сайжруулах чиглэлээр чадавхиа бэхжүүллээ.
Мөн Европын холбооны “COARM Outreach 7”, “P2P P105” төслийн Мэргэжилтэн Ноён Матяж Муровец “Монгол Улс дахь стратегийн худалдааны хяналтын хууль эрх зүйн орчин, экспортын барааны тусгай зөвшөөрөл олгох үйл ажиллагаа, түүний хэрэгжилтийг хангуулах асуудал” сэдэвт семинарын үр дүн, цаашид хэрэгжүүлэх арга хэмжээ, төслийн үйл ажиллагааны төлөвлөгөөг боловсруулах талаар харилцан санал солилцох хоёр талт уулзалтыг 2025 оны 09 дүгээр сарын 26-ны өдөр Гаалийн ерөнхий газарт зохион байгуулж, цаашдын хамтын үйл ажиллагааны талаар харилцан санал солилцож, албан хаагчийн чадавхыг бэхжүүлэх чиглэлээр дэмжиж ажиллахаа илэрхийллээ.
