Итгэмжлэгдсэн аж ахуйн нэгжийн чадавхыг бэхжүүлэх ажлын хэсгийн анхдугаар хуралдааныг зохион байгуулж байна
Бүс нутгийн эдийн засгийн хамтын ажиллагааг бэхжүүлэхэд чухал үүрэгтэй “Их түмэн санаачилга” (ИТС) хөтөлбөрийн хүрээнд Итгэмжлэгдсэн аж ахуйн нэгжийн чадавхыг бэхжүүлэх ажлын хэсгийн анхдугаар хуралдааныг Монгол Улсад 2025 оны 10 дугаар сарын 21-24-ний өдрүүдэд зохион байгуулж байна. Итгэмжлэгдсэн аж ахуйн нэгжийн чадавхыг бэхжүүлэх төслийг 2024 онд Монгол Улсад зохион байгуулагдсан Их түмэн санаачлагын сайд нарын зөвлөлдөх уулзалтаар хэлэлцэн БНСУ-ын Эдийн засаг, худалдааны яамны санхүүжилтээр 2025-2026 онд хэрэгжүүлэхээр болсон юм.
Өнөөдөр болж буй анхдугаар хуралдааныг төслийг санаачлагч ГЕГ-аас “ИААН хөтөлбөр нь ДГБ-ын Дэлхийн худалдааг Аюулгүй байлгах, хөнгөвчлөх багц стандартын үндсэн тулгуур бөгөөд худалдааны урсгалыг хөнгөвчлөхийн зэрэгцээ нийлүүлэлтийн сүлжээний аюулгүй байдлыг хангах дэлхий нийтийн итгэмжлэлийн механизм юм. Энэхүү хөтөлбөр өдгөө орчин үеийн Гаалийн байгууллагын шилдэг арга хэрэгсэл болж, Гааль-Бизнесийн түншлэлээс илүү өргөжиж гааль болон бусад төрийн байгууллагын хамтын ажиллагааны тогтсон механизм болж хөгжсөөр” байгааг онцолж, хуралдааны үйл ажиллагаанд амжилт хүслээ.
Тус хуралдааныг ИТС-ийн гишүүн орнуудын ИААН-ийн хэрэгжилт, түүний дотор үндэсний хэмжээнд Төрийн бусад байгууллагын хөнгөлөлт эдлэх сайн туршлагыг харилцан солилцох, тулгамдсан асуудал, шийдлээ хамтдаа хэлэлцэх, улмаар бүс нутгийн гаалийн хамтын ажиллагааг шинэ түвшинд гаргах үнэ цэнтэй боломж гэж харж байгаа юм.
Дараа дараагийн хуралдааныг 2026 онд БНХАУ, ОХУ, БНСУ-д зохион байгуулж, ИААН-ийн хөтөлбөрийн баталгаажуулалт хийх чадавхыг бэхжүүлэх, харилцан хүлээн зөвшөөрөх хэлэлцээрийн үр нөлөөг тооцох зэрэг олон чухал асуудлыг шийдвэрлэхээр төлөвлөөд байна.
