Өрхийн эмч нарыг "чадваржуулж" дүүргийн эмнэлгийн ачааллыг багасгая
Ахмад настан, хөгжлийн бэрхшээлтэй иргэд, нярай хүүхэдтэй эхчүүдийн гол зорьж очдог газар бол өрхийн эрүүл мэндийн төв. Гэвч өрхийн эмнэлэгийн эмч нарын чадварын асуудал шүүмжлэл дагуулсаар байна.
Учир нь зарим эмч харшил, уушгины хатгалгааг ч ялгалгүй тохирохгүй эмчилгээ бичиж өгсөн тохиолдол цөөнгүй гарчээ. Тиймээс өрхийн эрүүл мэндийн төвд чадварлаг нарийн мэргэжлийн эмч ажиллуулах зайлшгүй шаардлага тулгарч байна.
Энэ талаар бид иргэдээс тодруулахад,
Тэд хэлэхдээ,
Иргэн Б: Ер нь чадвар муутай шүү дээ. Хаана ямар бичиг баримт хэрэгтэй, жирэмсэн эмэгтэйчүүдийг яаж хяналтанд авах зэргийн мэдлэг хүртэл дутмаг. Ханиадтай хүүхдийг хүртэл мэддэггүй. Би хүүхдээ ханиад хүрэхэд нь өрхийн эмнэлэгээр үйлчлүүлэхэд буруу эм бичиж өгөх, цээж нь шуугисан байхад мэддэггүй юм билээ. Тиймээс өрхийн эмч нарыг чадварыг сайжруулах нь зөв юм болов уу гэж бодсон. Иргэдэд үйлчилгээ үзүүлэх анхан шатны эмнэлэг нь чадвартай байвал дараа дараагийн шатлалын эмнэлэгүүдийн ачаалал хүртэл буурна шүү дээ.
Иргэн Л: Өрхийн эмнэлэгээр үйлчлүүлэх дургүй. Яагаад гэвэл манай хамаатны дүүг буруу оношилсоноос болж олгой нь дотроо хагарч хүндэрсэн. Улмаар 10 гаруй цагийн маш хүнд хагалгаанд орж байсан удаатай. Хэрэв тухайн үед өрхийн эмч нар нь олгой гээд зөв оношилсон байсан бол дотроо хагарч хүндрэхгүйгээр жижиг мэм заслаар эмчлэх боломжтой байсан гэж эмч нар хэлж байсан. Буцаад өрхийн эмнэлэг дээрээ ирэхэд манайд үзүүлсэн гэж битгий хэлээрэй гэж хэлсэн. Тэгэхээр чадваргүй гэдгээ өөрсдөө ч мэддэг байх.
Иргэн Х: “Өрхийн эмч нар дүүргийн эмч нараа гүйцэхгүй гэж боддог. Манай хүүхдүүд ханиад хүрлээ гэж бодоход би дүүргийн эмнэлэг рүүгээ эхлээд явдаг. Өрх дээр очихоор яг өвчнөө эмчлэх эм бичиж өгч чаддаггүй. Чадвар нь сул” гэлээ.
Өрхийн эмнэлгийн үйлчилгээ, оношилгоо сайн байвал хүн амын дундаж наслалт нэмэгддэг гэж олон улсад үздэг юм билээ. Гэтэл өрхийн эмнэлэгийн эмч нар туршлага, мэдлэг хомс учраас иргэд ихэвчлэн шууд дүүргийн эмнэлэг бараадан ачааллыг улам нэмэгдүүлдэг. Өрхийн эрүүл мэндийн төвд нарийн мэргэжлийн эмч нар ажилладаг болчихвол хоёр, гуравдугаар шатлалын эмнэлгүүдийн ачаалал буурах нь гарцаагүй.
Дөнгөж сургууль төгссөн хүүхдүүдийг өрхийн эмнэлэгт хуваарилж суулгачихаад нарийн мэргэжлийн эмч нарын үзлэг хийдэг аппарат, тоног төхөөрөмжөөр хангаад байвал үүнийг ямар эрүүл тогтолцоо гэх вэ. Уг нь эмзэг, өвчлөмтгий бүлгийнхэнд үйлчилдэг анхан шатны байгууллага нь хамгийн чадавх сайтай байх учиртай. Гэтэл Монголд хамгийн чадавх сул байгууллага нь өрхийн эмнэлэг болоод байна. Хатуухан хэлэхэд, хүүхэд, хөгшидгүй дадлагажигч эмчийн “тоглоом” болж байна.
