Тендер: МҮОНРТ 85 сая төгрөгөөр шинэ жилээ тэмдэглэнэ!

Манай томчуудын хувьд төсвөө хэмнэж, бүсээ чангална гэдэг пиар, попрол л болохоос хэрэг дээрээ хэмнэдэг нь бараг үгүй. Ердөө хоёр сарын өмнө эмч, багш нарын цалинг өсгөж, тэтгэвэр тэтгэмжийг нэмэх асуудалд сайд дарга нар “манайд төсөв байхгүй, данс улайсан” хэмээн гүрийж байсан. Гэтэл өнөөдөр Засгийн газар нь дэд сайдын орон тоог эргэн сэргээж төрийн ордноор нэг будаг нь ханхалсан 18 шинэ сайд хөл нь газар хүрэхгүй хөөрч, хөлхөлдөж өнжив. Дээгүүрээ ийн найрлаж суухад доогуур нь бас бужигнаастай.

Иргэдийн хураамж болон төсвийн татаасаар орлогоо бүрдүүлдэг МҮОНРТ 85 сая төгрөгөөр шинэ жилээ тэмдэглэх гэнэ. Тодруулбал, Монголын Үндэсний олон нийтийн радио телевиз  өчигдөр /2025.12.16/ шинэ жилийн цэнгүүн зохион байгуулах 85 сая төгрөгийн тендерээ нийтээд зарлалаа.

Уг нь энэ сарын 10-ны өдрийн /2025.12.10/ Засгийн газрын хуралдаанаар төсвийн хэмнэлттэй холбоотойгоор төсвийн хөрөнгөөр шинэ жил, байгууллага болон салбарын ой тэмдэглэх зэрэг нийтийн арга хэмжээ зохион байгуулахгүй байхыг Ерөнхий сайд Г.Занданшатар сүр дуулиантайгаар үүрэг болгосон. Бодвол энэ шийдвэр Үндэсний телевизэд үйлчлэхгүй бололтой.

Зарласан тендерийнх нь агуулга бас их хоржоонтой. Тендер шалгаруулалтын төрөл нь ажил санхүүжилтийн эх үүсвэр өөрийн хөрөнгө, нийт төсөв 85 сая төгрөг гэсэн байгаа юм. Эндээс Үндэсний телевизийн шинэ жилийн арга хэмжээг зохион байгуулах нь асар том ажил бөгөөд тус байгууллага өөрийн хөрөнгө, хогшилтой болж таарч байна. Үнэндээ Үндэсний телевизийн ажилчдын цалин хэт доогуур, хөдөлмөрийн хөлсний үнэлгээ тааруу гэх хэл ам хэзээд асуудал дагуулж ирсний дээр бидний мэдэхээр хураамж, татаас хоёроор санхүүждэг. Харин баяр ёслол зохион байгуулах болохоороо өөрийн хөрөнгөтэй болчихдог бололтой.