Иргэн Б.Энхцэцэг: Нийгэмд бид хаягдаж байна.Гэр хорооллын нэгэн хашаа байшинд өвчтэй ээж дөрвөн хүүхэд ингэж аж төрж байна. Бидэнд туслаач надад хандах газар үнэхээр алга!

Манай редакцид захидал ирлээ

Сайн байна уу? Намайн Б.Энхцэцэг гэдэг. Би жирийн нэг ээж, эмэгтэй хүн дөрвөн хүүхдийн ээж. 2015 онд миний амьдралын хар дарсан зүүд эхэлсэн юм. 2007 онд хүнтэй сууж дөрвөн хүүхдийн аав, ээж болж аз жаргалтай байсан. Гэтэл 2015.06.28-ны шөнө нөхөр маань хүний гарт амь үрэгдэж би 7 сараас 8 насны дөрвөн хүүхэдтэй хоцорсон юм. Нөхөр маань цэл залуухан 33 насандаа тэнгэрийн оронд одсон.

Тэр цагаас хойш хийж болох бүхий л ажлыг хийж хүүхдүүдээ зөв хүн болгохын төлөө явсан. Өөрийн гэсэн орон гэргүй өдийг хүртэл нийтийн байр түрээсэлж амьдарч байгаад энэ оны намар ЗХ-ний 120-р ангийн захиргаанд захидал явуулж таван ханатай гэртэй болсон юм. Хэчнээн зүтгэж ажилласан ч орон гэртэй болж чадахгүй нийгэмд амьдарч байна. Хоёр жилийн өмнөөс бие маань өвдөж маш удаан хугацаанд эмнэлгээр явсан боловч онош нь тодорхойгүй их удсан. Одоо харин уушгины 70 хувиа тайруулах шаардлагатай гэсэн. Хэнд ч гэм хор хийгээгүй зүтгээд л байсан хэр нь...

Хүүхдүүд маань нөхөн төлбөр ч аваагүй. Ганцхан миний хүүхдүүд ийм азгүй юм уу? Эсвэл би муу ээж үү гэсэн бодол үргэлж төрдөг боллоо. Батлан хамгаалахын сайдад хүсэлт явуулсан боловч хариу ирээгүй! Би хандив гуйгаагүй! Бидний, амьдарч буй орчин нөхцөлийг минь сонсож, гарц гаргалгаа гаргаж өгөөч гэж хүсэж байна. Нийгэмд бид хаягдаж байна. Нөхөр минь байсан бол арай өөр байх байсан.

Миний энэ захидлыг цааш нь түгээж өгөөч элэг нэгт ахан дүүс минь! Гэр хорооллын нэгэн хашаа байшинд өвчтэй ээж дөрвөн хүүхэд ингэж аж төрж байна. Бидэнд туслаач надад хандах газар үнэхээр алга!