Н.Намуу: AI системийн илрүүлсэн зөрчлийг “Шалгаж байна” гэсэн мэдэгдлийг иргэд торгуультай андуураад бухимдаад байна
Энэ сарын 1-ний өдрөөс эхлэн замын хөдөлгөөний зөрчлийг хиймэл оюун ухаан буюу AI-аар илрүүлэн шийдвэрлэх автомат хяналтын систем хэрэгжиж эхэлсэн. Гэвч авто замын зөрчил, түгжрэлийг бууруулах зорилготой энэхүү ажил хэрэгжсэнээр иргэдийн бухимдлыг төрүүлээд буй. Тухайлбал “Тэмдэг тэмдэглэгээ зөрчөөгүй байхад торгож байна, зам тавьж өгөөд баруун эргэх дээр торгуульсан, галын болон түргэний машинд зам тавьж өгснийхөө төлөө торгуулж байна” гэх зэргээр цахим орчинд шүүмжлэлтэй хандсаар буй.
Тэгвэл үүнтэй холбоотойгоор ЗХУТ-өөс мэдэгдэл хийсэн. Тодруулбал ЗХУТ ОНӨТҮГ-ын Хөдөлгөөн зохицуулалт, хяналтын хэлтсийн дарга Н.Намуу "2025 оны тавдугаар сараас жолоочид ухаалаг системийн илрүүлж буй зөрчилтэй холбоотой сануулах мессежийг хүргэж эхэлсэн. 2026 оны нэгдүгээр сарын 1-ний өдрөөс эхэлж “Шалгаж байна” гэх горимоор иргэнд мэдээллийг хүргээд, эрх бүхий албан тушаалтан зөрчил бүрийг хянан шийдвэрлэж байна. Цахим орчинд иргэдийг бухимдуулаад байгаа 10 орчим төрлийн гомдол байна. Тэдгээрийг шалгаад үзэхэд AI буруу ажиллаж, жолооч буруугүй байхад нь торгосон тохиолдол байгаагүй. Ухаалаг системийн илрүүлсэн зөрчлийг “Шалгаж байна” гэсэн мэдэгдлийг иргэд торгож байна гэж бухимдаад байна. Жолооч таны авто замын хөдөлгөөнд оролцож байгаа энэхүү үйлдлийг AI бүртгэлээ, эрх бүхий албан тушаалтан хянан баталгаажуулаад шалгаж байна гэдэг төлөв юм аа. Үүнийг торгуультай андуураад байна. Зөрчил болсон гэх 10 тохиолдлын тухайд ухаалаг систем алдаа гаргаагүй. Дугаарын стандарт хангаагүйгээс А, Д хоёр үсгийн зураас арилсантай холбоотой нэг алдаа гарсан байсныг шалгаад сайжруулалтыг хийсэн.
-Хурд хэтрүүлэл, гэрэл дохионы зөрчил, тухайн чиглэлийн тээврийн хэрэгслийн эгнээний зөрчил, эгнээ байр буруу эзэлсэн, автобусны буудал дээр зогссон, зогсох шугам, үргэлжилсэн цагаан шугам давж эргэсэн, урсгал сөрсөн, түр буюу удаан зогсох хориотой хэсэгт тээврийн хэрэгсэл байршуулсан, явган хүний зам дээр, ногоон байгууламж, орц гарц хаасан автомашины хөдөлгөөнд албан ёсоор торгуулийн арга хэмжээ авна. Шалгаж байна гэсэн мэдэгдэл зөрчил болж очихгүй бол тухайн үйлдэл зөрчил биш, торгууль оногдуулаагүй гэж иргэд ойлгох хэрэгтэй. Ухаалаг системийн нэвтрүүлэлтийн зорилго нь иргэнээ торгох биш. Замын хөдөлгөөний аюулгүй байдлыг нэмэгдүүлэх, түгжрэлийг сааруулах, жолоочийг хариуцлагажуулах юм. Өмнө нь 13 сая зөрчил илрүүлж, шалгаж байсан бол 5 хоногийн хугацаанд 4000 болтлоо буурсан байна. Энэ нь иргэд, эгнээ байраараа зорчдог болжээ гэсэн үг. Эерэг өөрчлөлтүүд гарч эхэлж байна.
-Буяны ажлын цуваанд яваа авто машиныг AI торгохгүй гэсэн эрх зүйн зохицуулалт байхгүй. Буяны үйл ажиллагааг зохион байгуулж байгаа компаниас цуваанд яваа машин гэдгийг илтгэж буй хуудас өгдөг болохоос тухайн тээврийн хэрэгслийг торгож болохгүй гэсэн зөвшөөрөл биш. Гэтэл таны зөрчилтэй холбоотой нотлох баримтыг бүрдүүллээ, уулзварын голд цагдаа зохицуулалт хийж байсан нь шалгалтаар нотлогдоно. Энэ тохиолдолд эрх бүхий албан тушаалтан хянан баталгаажуулаад торгуультай холбоотой зөрчлийг шийдвэрлэнэ. Түргэн тусламж, Гал унтраах машин зэрэгт зам тавьж өгсөн нь тогтоогдвол таныг торгохгүй ээ." хэмээх тайлбар хийсэн юм.
