Д.Саяннямбуу: Нүдний мэдрэлүүд өвдөөд харахад хэцүү байдаг юмыг 2 болгож хардаг. Өдөрт бага өвдөх нь л миний хувьд чухал зүйл

УИХ-ын гишүүн асан Ц.Цэрэнпунцагийн хүү Ц.Санжаачойпэл, “Эрэл”-ийн Б.Эрдэнэбатын хүү Э.Тэмүүлэн, “Говь”-ийн Ц.Баатарсайханы хүү Б.Амарсайхан нарт холбогдох шүүх хурал өнөөдөр /2026.01.14/ Сүхбаатар, Баянзүрх, Чингэлтэй дүүргийн эрүүгийн хэргийн анхан шатны шүүхэд боллоо.

Шүүх хурлын явцад сэжигтэн Ц.Санжаачойпэл “Шүүх хуралд хоёр өмгөөлөгчтэй оролцох хүсэлтэй байна. Шүүх хурлыг хойшлуулж өгнө үү" гэх хүсэлтийг гаргасан. Улмаар тус шүүх хурлыг 2025.01.29 хүртэл хойшлууллаа.

Санжаачойпэл, Э.Тэмүүлэн, Б.Амарсайхан, Л.Алтан-Очир нарт зодуулсан хохирогч Д.Саяннямбуугаас зарим зүйлийг тодрууллаа.

-Таны биеийн байдал ямар байгаа вэ? Эмчилгээ нь дууссан уу?

- Эмчилгээ дуусаагүй. Урт хугацаанд эмчилгээ хийлгэнэ. Зарим нэг саажилтууд байгаа. Одоо хүртэл толгой өвддөг. Хагас жил өдөр шөнөгүй ингээд өвдөж байна.

-Нүд нь гайгүй юу?

-Нүдний мэдрэлүүд өвдөөд харахад хэцүү байдаг юмыг 2 болгож хардаг. Өдөрт бага өвдөх нь л миний хувьд чухал зүйл. Би өөр юмандаа анхаарч чаддаггүй байсан

-Өнөөдрийн шүүх хуралд яллагдагчаар татсан байна. Яагаад яллагдагчаар татсан юм бол?

-Сайн мэдэхгүй байна.  

Хэргийг эргэн сануулахад, Эрдэнэбатын Тэмүүлэн, Цэрэнпунцагийн Санжаачойпэл нарыг “2025 оны 7 сарын 18-19-нд шилжих шөнө Сүхбаатар дүүргийн 3 дугаар хорооны нутаг дэвсгэрт үйл ажиллагаа явуулдаг “Канте” шөнийн цэнгээний газрын гадаа талбайд хохирогч Д.С-ын нүүрэн тус газарт нь гараараа цохих, хөлөөрөө өшиглөх зэргээр биед нь бүлэглэн халдаж эрүүл мэндэд нь хохирол учруулсан” гэх хэргээр мөрдөн шалгах ажиллагааг явуулж явуулж, хэргийг шүүхэд шилжүүлсэн байдаг. Хохирогчийн биеийн байдал хүнд, нүднийх нь цаад аяганы яс хугарсан гэх мэдээллийг хохирогчийн аав өгч байсан билээ.