Вашингтон 75 орны иргэдэд цагаачлалын виз олголтоо түр зогсоолоо
Энэ сарын 14-нд АНУ-ын Төрийн Департамент 75 орны иргэдэд зориулсан цагаачлалын визний боловсруулалтыг түр хугацаагаар зогсоохоо зарлав. Энэ сарын 21-нээс эхлэх хязгаарлалт нь Орос, Бразил, Иран, Ирак, Таиланд, Сомали, Узбекистан, Беларусь, Афганистан, Бразил, Египет, Нигерия, Йемен, Хаити, Гватемала, Косово, Кувейт, Камбож, Ливан, Ливи, Уругвай зэрэг 75 орны иргэдэд хамаарна. Монгол Улсын нэр ч энэ хязгаарлалтад багтсан сурагтай. Эдгээр хязгаарлалт нь жуулчны, оюутны болон богино хугацааны ажлын визэнд нөлөөлөхгүй, харин цагаачлалын визэнд онцгойлон хамаарах аж.
Энэ талаар анх “Fox News” телевиз АНУ-ын Төрийн Департаментын баримт бичгээс иш татан мэдээлжээ. "Трампын засаг захиргаа Америкийн ард түмний баялгийг хулгайлахыг эрмэлздэг хүмүүсийн цагаачлалын системийг зүй бусаар ашиглахыг зогсоох болно" гэж Төрийн Департаментын хэвлэлийн төлөөлөгч Томми Пиготт мэдэгдэв. Америкийн Ерөнхийлөгч Европын бус гаралтай хүмүүсийн цагаачлалыг бууруулах хүсэлтэй байгаагаа нуусангүй. Тэрбээр өмнө нь сомаличуудыг "төрсөн газартаа буцах ёстой" гэж оронд нь Скандинавын иргэдийг АНУ-д нүүж ирэхийг эсэргүүцэхгүй гэж мэдэгдэж байсан. Өнгөрсөн даваа гарагт АНУ-ын Төрийн Департамент “Дональд Трамп Цагаан ордонд эргэн ирснээс хойш 100 000 гаруй визийг цуцалж, жилийн дээд амжилтыг тогтоосон” гэж мэдэгдсэн юм. Тэгвэл өнгөрсөн сард АНУ-ын Дотоодын аюулгүй байдлын яам 605 000 гаруй хүнийг албадан гаргасан бол 2.5 сая гадаад иргэн сайн дураараа гарч явсан гэдгийг мөн онцлон мэдээллээ.
Жинхэнэ хүн болсон үеийг тогтоов
Скотт Уильямсаар ахлуулсан Нью-Йоркийн их сургуулийн багийнхан 20 жилийн өмнө Чадын цөлөөс илрүүлсэн олдворыг шинэчлэн судалсан талаараа мэдээлэв. “Хүний хамгийн эртний өвөг дээдсийн нэг сахелантропын олдворыг 3D аргаар шинжилж, хоёр хөл дээрээ явдаг байсныг нь тогтоолоо” гэж мэдээлсэн судлаачид биеийн бүтцийнх нь шинж чанараар ийнхүү тогтоосон аж.
Ойролцоогоор долоон сая жилийн настай сахелантропын олдворыг нарийн технологи ашиглан гуяны ясан дээр цухуйсан трохантерын булцууг илрүүлжээ. Энэ нь аарцаг болон гуяны ясыг холбосон шөрмөсний бэхэлгээ аж. Сахелантропын тохойн ясыг гуяныхтай нь харьцуулахад богино байсан бөгөөд ийм харьцаа нь хоёр хөлтэй хөдлөх хөдөлгөөнд шилжихтэй холбоотой. Энэ бол хоёр хөлөөрөө алхаж чаддаг болохыг шууд нотлох баримт аж. Энэ талаар “Science аdvances” сэтгүүлд “Дөрвөн хөлтэй амьтад хоёр хөл дээрээ зогсдог болсон түүх бий. Тэгвэл хүнийг жинхэнэ хүн болгосон үе буюу хоёр хөлөөрөө явдаг болсон үе хэзээ вэ.
Хүний хамгийн эртний өвөг дээдэс болох сахелантроп энэ асуултын хариулт боллоо. Энэ нь хоёр хөлөөрөө анх алхсан амьтан болохыг америк судлаачид тогтоов. 2001 онд Францын судалгааны багийнхан Африкийн Чадын Жураб цөлөөс нээсэн эл олдворыг тухайн үед шинжилсэн. Ингэхдээ гавлын ясанд төвлөрч хоёр хөл дээрээ явдаг гэж дүгнэсэн ч зарим эрдэмтний эсэргүүцэлтэй тулж, "Зөвхөн гавлын ясанд үндэслэн хоёр хөлтэй байсан гэж тодорхойлох нь өрөөсгөл. Хүн, эсвэл сармагчин эсэх нь тодорхойгүй амьтны олдвор” зэргээр маргаан дэгдээснээр нээлтээ олон нийтэд танилцуулаагүй орхижээ. Гэхдээ үнэхээр энэ нь анхлан хоёр хөл дээрээ явсан амьтан мөн болохыг энэ цагт баталлаа. Инйхүү хувьссан нь амьтныг хүн болгосон чухал эргэлтийн үе” гэж мэдээлжээ.
Ташрамд өгүүлэхэд, Африкийн Сахарын цөлийн бүс нутгаас илрүүлсэн учраас "Sahel", Чадыг илэрхийлсэн "tchadensis" гэсэн үгээр эл олдворыг нэрлэж, шинжлэх ухаанд бүртгүүлсэн байна.
Ж.Цэцэг
