СУИС-ийн дуулиан: Э.Сонинтогос 2010-2025 онд захирлаар ажилласан бол түүний ажлыг авсан МУГЖ Б.Бат-Эрдэнэ 2014-2017 онд хохирогч охины сурч байсан Соёлын дээд сургуулийн захирал байжээ. Эрхэм захирлуудаас асуух асуулт бидэнд байна!
Жил болгон СУИС-тай холбоотой дээрэлхэлт хүчирхийлэл зодооны түүхүүд задардаг нь уламжлал боллоо. Олонд алдаршсан эмэгтэй жүжигчид доод ангийнхнаа хэрхэн дээрэлхэж винонд гүйлгэдэг байснаа инээд алдан ярьсан, эрчүүд нь хагас цэрэгжилтийн байдалтай дүлийртэл алгадуулдаг зодуулж байж жүжигчин болно гэсэн дүрэм байсныг ил ярина.
Хожим жүжигчин болсон ч оюутан дүү нараа авч ирж үнэ хөлсгүй заран зодож буй нь нийтэд ил болоод байв. Энэ удаагийн шүгэл үлээсэн охины хэргээс үүдэн охины царайг тод томруун харж гайхах, өрөвдөхөөс гадна тухайн үед сургуулийг удирдаж байсан захирлуудад хариуцлага тооцох, асуух асуулт бидэнд байна.
2025 он хүртэл тэтгэвэртээ гартлаа СУИС-ийн захирал байсан Э.Сонинтогос СГЗ болж алдаршсан, түүний орыг нь залган захирал болсон “Хонхны нулимс” Б.Бат-Эрдэнэ дуучнаас гадна СУИС-ийн салбар сургуульдаа тухайн хохирогч охиныг суралцаж байх үед захирал байжээ. Энэ хоёр хүн л СУИС-ийг дуулиант дээрэлхэлт хүчирхийлэлтэй жилүүдэд удирдаж ирсэн байна!
СУИС өөрөө өөртөө үйлчилдэг АТМ биш. Төлбөрөө төлөөд сурч байгаа оюутан эрдэм мэдлэгийн их уурхайгаас эрдэм хүртэх ёстой болохоос энэ бүгдийг амсах ёсгүй. СУИС удирддаг захиралтай албан байгууллага, боловсролын байгууллага. Тэнд соёл түгээхээс үе тэнгийнхнээ хэрхэн дээрэлхэх хүчирхийлэх тухай заадаггүй биз дээ захирлууд аа?
Захирлууд юу хийж байсан бэ, маш олон хохирогчтой нийгмийг сэртхийлгэсэн аймшигт хүчирхийллүүд СУИС-ийн оюутнуудаас л гарч байсан тэр үед? Та бүхэн яагаад нэг ч удаа ийм дуулиан гарах бүрт олны өмнө гарч хариуцлага хүлээж хэрхэн засаж сайжруулах талаараа дуугардаггүй юм бэ? Оюутнуудаа боловсруулж аюулгүй орчинд суралцах нөхцлөөр хангаж чадаагүй захирлууд бүх гавьяа шагналаа хураалгаж дахин боловсролын байгууллагад, урлагт хөл тавихгүй байх хариуцлагын систем нэвтэрч байж СУИС эрүүлжих үү?
