Багш Р.Алтанцэцэг: П.Наранбаяр сайд цалин нэмсэн гэж түмэнд зарлаж үнийн хөөрөгдөл үүсгээд одоо бодит байдал дээр багш нар хуучин цалингаа л авч байна
Засгийн газраас багш нарын үндсэн цалинг энэ оны нэгдүгээр сарын 1-нээс 50 хувь, 11 сарын 1-нээс 26 хувиар нэмэгдүүлж 2,8 сая төгрөгт хүргэхээр болсон. Тэгвэл өнөөдрөөс багш нарын цалин бууж эхэллээ. Гэтэл цалин нь 50 хувиар нэмэгдэх бус харин ч эсрэгээрээ хасагдаж орж байна гэсэн асуудал үүсээд буй.
Тэгвэл бид энэ талаарх мэдээллийг Замын-Үүд сумын 2-р цэцэрлэгийн багш Р.Алтанцэцэгээс тодрууллаа.
-Сайн байна уу? Өнөөдрөөс багш нарын цалин орж эхэлж байна. 2026 оны нэгдүгээр сарын 1-нээс 50 хувиар нэмэгдэнэ гэсэн шийдвэр гарсан. Таны цалин нэмэгдэж орсон уу?
- Миний цалин 200 мянган төгрөгөөр л нэмэгдсэн байна. Ер нь бол Боловсролын сайд үндсэн цалинг 50 хувиар нэмсэн гэж ярьж байгаа. Үндсэн цалингийн хувьд бол нэмэгдсэн. Гэтэл цалин дээр нэмэгдэж ордог бусад нэмэгдлүүд хасагдсан байгаа юм. Тухайлбал, би 36 жил цэцэрлэгийн багшаар ажиллаж байна. Олон жил ажилласан нэмэгдэл гэж 25 хувийн нэмэгдэл цалин авдаг байв. Гэтэл өнөөдөр 20 хувь болж буурсан. Уг нь тэр урамшуулал, нэмэгдэлүүдийг одоо нэмэгдсэн цалин дээрээс бодох ёстой байтал хуучин цалингаас бодоод 389,750 авдаг байсан чинь 311,800 төгрөг болж 70 гаруй мянган төгрөгөөр дутуу орсон. Тэгээд мэргэжлийн зэрэг, орон нутгийн нэмэгдэл хоёр нь 121000 төгрөг хасагдаж орж ирсэн. Гэтэл салбарын сайд болохоор багш нарын цалинг нэмлээ гэж түмэнд зарлаад юмны үнээ хөөрөгдүүлсэн мөртлөө багш нарын гар дээр яг нөгөө авдаг цалинг нь буцаагаад тавихаар маш харамсалтай байна.
-Танай цэцэрлэгт өөр цалин нь хасагдаж орсон багш байгаа юу?
- Байгаа. Манай цэцэрлэгийн няравын цалин хасагдаж орсон байна. Одоохондоо багш нартайгаа яг уулзаж ярилцаж үзээгүй байна. Манай байгууллага 20 гаруй ажилтантай хэрэв бүгд бөөгнөрч байгаад ярилцвал нилээн хэдэн хүмүүсийн цалин хасагдаж орсон бололтой.
-Таны хувьд нэмэгдэлтэйгээ яг хэдэн төгрөгийн цалин бууна тооцож байсан бэ?
- Би нэмэгдэлтэйгээ 4 сая гараад бууна даа гэж тооцож байлаа. Цалин хоцорч орж байгаа учраас хүүтэй зээл авч цалингийн зээлээ төлсөн. Ингээд надад 2 сая гаран төгрөг найдвартай үлдэнэ гэж бодож байтал илүү цаг, урамшуулал, олон жилийн нэмэгдэл гээд бүгд хасагдаад 2,6 сая төгрөг буусан байна.
