З.Цогтгэрэл: Засгийн газар хуулийн дагуу хүлээсэн үүргээ биелүүлэхгүй бол бид тэмцэл, хөдөлгөөнөө үргэлжлүүлэх болно
Боловсрол, Эрүүл мэндийн салбарын тэмцлийн үр дүнд цалин хөлс нэмэгдсэнтэй холбогдуулан ажилчдад олгогдох ёстой цалингийн нэмэгдэл хэлэлцээрийн дагуу бүрэн хэрэгжихгүй байгаа талаар сүүлийн үед олон нийтийн дунд маргаан, ойлгомжгүй байдал үүсээд байна хэмээн МҮЭ-ийн холбоо, МБШУҮЭХ, МЭМАҮЭХ-ноос хэвлэлийн хурал зохион байгууллаа.
Боловсрол шинжлэх ухааны үйлдвэрчний эвлэлийн холбооны дарга З.Цогтгэрэл:
“2026 оны улсын төсөвтэй холбоотойгоор бид шаардлагатай тавьж, суулт, ажил хаялт зарласны эцэст цалингийн нэмэгдлийн үр дүнд хүрсэн. Монголын өнцөг булан бүрд байгаа олон мянган гишүүдээс хүсэлт, шаардлага ирүүлсээр байна. 2026 оны 1 сарын 1-нээс цалин хөлс 50 хувь нэмэгдэхээр болсон ба энэ нь яг бодит байдалд биеллээ олсон уу гэдэг нөхцөл байдал үүсээд байгаа.
Монгол Улсын Засгийн газар хэлэлцээрт хүлээсэн үүргээ биелүүлэхийг шаардаж байна. Өдгөө боловсролын салбарт хүний нөөцийн дутагдал, хөдөлмөрийн мөлжлөг, боловсролын чанарын хүртээмж, судалгаа шинжилгээний ажил доод түвшиндээ байна. Үүнийг сайжруулж, улс орны хөгжилд хувь нэмэр оруулах ёстой ч өнөөдөр хүний нөөцийн дутагдал 5000 гаруй байсан бол дахин хасагдах төлөвтэй байна.
Засгийн газар хуулийн дагуу хүлээсэн үүргээ биелүүлэхгүй бол бид тэмцэл, хөдөлгөөнөө үргэлжлүүлэх болно” гэв.
Харин багш нарын төлөөлөл, “Засгийн газраас багш нарын цалинг 50 хувь нэмэгдүүлнэ гэсэн боловч бодит байдал дээр 50 хувь нэмэх биш эсрэгээрээ 50 хувиар буурч орж байна. Жишээ нь, Чингэлтэй дүүргийн 18-р цэцэрлэг 12 бүлэг 50 ажилтантай. Энэ цэцэрлэг өмнө жилүүдэд 90-98 сая төгрөгийн төсөвтэй байдаг. Гэтэл энэ төсөв буурч 59 сая төгрөг болсон. Тэгэхээр энэ 50 сая төгрөгийн төсвийг хуваахаар нэг ажилтан нэг сая төгрөг авах юм уу. Энэ одоо цалин нэмэгдсэн гэсэн үг үү, буурсан гэсэн үг үү. Боловсролын сайдаас асуумаар байна. Хэрэв төрийн дээд удирдлагууд гэрээ хэлэлцээртэй, амлалтандаа хүрэхгүй бол бид тэмцлээ өрнүүлэхэд бэлэн байна. Ажил хаяхад хүртэл бэлэн. Багш ажилчид нэмэгдэлтэй цалинг маш их хүлээж байлаа. Бид өрнөөс өрөнд, зээлнээс зээлний хооронд амьдарч байгаа хэцүү байна” гэлээ.
