Б.Мэргэн өмгөөлөгчийн алдартай хэргүүд болон түүний тухай сонирхолтой 10 баримт

Өнгөрсөн хоёр 7 долоо хоногт хоёр ч дуулиант хэргийн шүүх хурлын ард гарч, өмгөөлсөн хүмүүсээ цагаатгаж чадсанаараа өмгөөлөгч Б.Мэргэн олон нийтийн анхаарал, сонирхлын тайзан дээр гарч ирлээ. Өмгөөлөгчийн үүрэг үйлчлүүлэгч нь хэрэг үйлдсэн эсэхээс үл хамааран гагцхүү хэргээс л мултлах нь мэргэжлийнх нь үндсэн чиг үүрэг хийгээд этик гэгддэг.

Ингээд Б.Мэргэний талаарх сонирхолтой баримтуудыг хүргэе.

Тэрээр анх сэтгүүлч болох бодолтой байжээ. Түүнийг ЕБС төгссөн 2004 онд Монголд анх удаа эрхзүйн улсын олимпиад “Билиг” их сургуулиас орон даяар зохион байгуулж Б.Мэргэн тэргүүн байранд шалгарчээ. Ийнхүү хуулийн ангид 4 жил үнэ төлбөргүй суралцах эрхийн бичгийн эзэн болсон байна. Улмаар МУИС, Хүмүүнлэг, Олон улсын харилцаанд шалгалт өгч бүгдэд нь тэнцсэн тэрбээр МУИС-ийн Хууль зүйн сургуулийг сонгожээ.

2012-2017 онд Үндэсний аюулгүй байдлын зөвлөлийн Ажлын албанд хуульчаар ажилласан. Зөвлөлийн тэргүүнээр нь Ерөнхийлөгч асан Ц.Элбэгдорж ажиллаж байв.

2019 онд М.Энхболдыг талбай дээр жагсаж байгаад огцруулах үед УИХ-ын даргынхаа суудлыг өгөөд нэр төрөө сэргээлгэхээр шүүхэд хандсан байдаг. Энэ үед түүнийг Б.Мэргэн өмгөөлсөн бөгөөд энэ цаг мөчөөс хойш түүнийг хамгийн өндөр үнэтэй өмгөөлөгч гэж цоллох болжээ.

2022 онд өмгөөлөгчөөр ажиллаж эхэлсэн түүнийг тавхан жилийн дараа алдартай боллоо, тэрбумтан боллоо гэлцэж байсан ч тэрбээр тухайн үед өгсөн ярилцлагадаа “Би машингүй. Байрны зээл 30 хувиа бүрдүүлсэн ч зээл гарахгүй байна. Өмгөөлөгчийн орлого тогтворгүй гэж үзсэн” гэж ярьж байв.

2019 онд гишүүн Д.Гантулгын хүчингийн хэрэг дээр түүнд хүчиндүүлсэн гэх эмэгтэйн өмгөөлөгчөөр ажилласан байдаг. “Н.Номтойбаяр гэрийнхээ үйлчлэгчид дарамт учруулсан гэх хэрэг тэгээд л замхарсан. Харин Д.Гантулга УИХ-ын гишүүнээсээ татгалзах алхам хийх хүртэл нийгмийн дэмжлэгийг бид бий болгож чадсан нь амжилт болсон юм. Эрх мэдэлтэй хүмүүс хэргээс мултрах ёсгүй гэсэн дохиог олон нийтэд болон улстөрчдөд тод харуулсан гэж боддог” гэж ярьж байв.

2023 онд Т.Ганболдын эхнэр Х.Янжингаажидын хэрэг дээр Б.Мэргэн УБЕГ-тай холбоотой захиргааны хэргийг нь өмгөөлж оролцсон. Тэрээр иргэний хэрэг өмгөөлдөггүй бөгөөд эрүү болон захиргааны хэргийн өмгөөлөгч юм.

Б.Мэргэн ТЕГ-ын дарга асан, хошууч генерал Б.Хурц, прокурор асан Г.Эрдэнэбатад холбогдох хэргээс олон нийтийн анхаарал татсан хэд хэдэн хэргийг өмгөөлсөн.

Б.Мэргэн талийгаач Г.Батбаяр өмгөөлөгчийн хамт С.Зоригийн хэргээр өмгөөлөгчийн хувьд сэтгүүлчдэд тайлбар хийж байсан. Тухайн үед С.Зоригийн амь насыг хөнөөсөн хэргийн талаарх баримтуудыг УИХ-ын гишүүн асан Ж.Батзандан, Л.Болд тэргүүтэй хүмүүс Төрийн ордноос задалж, мэдээлэл цацсан байдаг.

Б.Мэргэн Д.Саяннямбуугийн аавтай олон жил төрийн байгууллагад хамт ажилласан бол Ц.Санжаачойпэлтой түүний хууль зүйн фирм 2020 оноос хойш гэрээтэй ажиллаж байгаа аж.

Тэрбээр Б.Шинэсаран охины амиа алдсан хэрэгт хамжигч гэгдэн яллагдагчаар татагдсан Э.Ган-Эрдэнийг үнэ төлбөргүй өмгөөлж байгаагаа мэдэгдсэн. “Э.Ган-Эрдэнэтэй ямар ч холбоогүй, надад хандаа ч үгүй байсан. Тэр үед би урьдчилсан хэлэлцүүлэг гэдэг ийм ийм учиртай гэж пост бичээд, хохирогчдын эрх ашгийг хурдан хамгаалмаар байгаа бол хурдан урьдчилсан хэлэлцүүлгээс буцаана гэдэг биш, хурдан шүүх рүү шилжүүлээд шийдэх нь илүү хохирогчдын эрх ашгийг хамгаална шүү дээ хэмээн хууль тайлбарлаж бичиж байсан” гэж ярьсан.