Т.Навчаа: Нийгмийн сүлжээнд тархаж буй нэг пост, нэг видео нь тухайн вакцины бодит судалгаа, олон жилийн үр дүнг орлож чадахгүй
Хүүхдүүдэд товлолт вакцин хийхийг эсэргүүцэж байгаа талаар “Монгол ээжүүд” ТББ-аас өчигдөр /2026.02.03/ “Ээжээ намайг авраач” хэвлэлийн хурлыг зохион байгуулсан юм. Тэд хэлэхдээ, “Бидний үед эрүүл мэндийн тухай хуульд гаднаас оруулж ирж буй эм, тариаг тухайн улсдаа гурван жил хэрэглээд гаж нөлөө илрээгүй тохиолдолд Монгол Улсын эрүүл мэндийн салбарт нэвтрүүлнэ гэж заасан байдаг. Гэвч 2016 онд эмнэл зүйн туршилт явуулах журам батлагдсан байна. Вакцин хийлгэх ёстой гэж иргэд бие биедээ зөвлөх ёсгүй. Үүнийг гоц халдвар судлал болон эмзүйч, эмч, мэргэжлийн хүмүүс зөвлөх ёстой” гэсэн юм.
Харин энэ талаар хүүхдийн эмч, анагаах ухааны доктор Т.Навчаа цахим хуудаснаа дараах байр суурийг илэрхийлжээ. Тэрбээр “Эцэг эх бүр хүүхдээ хамгаалахыг л хүсдэг. Вакцины тухайд асуух, эргэлзэх, судлах нь муу зүйл огт биш. Энэ бол хамгийн чухал зүйл. Харин баталгаатай эх сурвалжаас, мэргэжлийн хүнээс асуух нь хамгийн зөв алхам юм. Бид өдөр бүр вакцинтай холбоотой асуулттай эцэг эхчүүдтэй уулздаг. Айдас, эргэлзээтэй ирдэг ч тайлбар сонсоод тайвширч гардаг нь олон. Нийгмийн сүлжээнд тархаж буй нэг пост, нэг видео нь тухайн вакцины бодит судалгаа, олон жилийн үр дүнг орлож чадахгүй” гэв.
