Сурвалжлага: Сар шинийн ширээний чимэг болсон сүүн ааруулын багц 350,000–950,000 төгрөгийн үнэтэй байна
Монголчуудын ахуй соёл, ёс заншлаа дээдэлж, гэр бүлийн халуун дулаан уур амьсгалыг бүрдүүлдэг сар шинийн баяр болоход 14 хоног үлдлээ.
Сар шинийн баярыг угтан үндэсний томоохон үйлдвэрлэгчид болоод жижиг дунд худалдаа эрхлэгчид экспог зорин бүтээгдэхүүнээ худалдаалдаг. Тухайлбал энэ жил Буянт-Ухаа, Мишээл экспо, Аса арена тэргүүтэй 70-100 гаруй ААН, иргэдийг хамруулсан үзэсгэлэн худалдааг зохион байгуулж буй. Тэгвэл хотын төвд байрлах ASA Arena-д болж байгаа “Жаргалтай золгоё” цагаан сарын үзэсгэлэн худалдаа олны хөлд дарагдаж, иргэд сар шинийн бэлтгэлээ идэвхтэй базааж байна.
Иргэд сүүлийн жилүүдэд уламжлалт хэвийн боовноос илүүтэйгээр ааруул, цагаан идээг голлон хэрэглэж, ширээгээ чимэх хандлага дэлгэрч буй. Тодруулбал хэвийн ааруулаар зассан тавгийн идээ 350-950,000 төгрөгийн хооронд худалдаалж байна. Харин хорхой, сүүн ааруул 25,000–45,000 төгрөг, тогооны өрөм 30,000–40,000 төгрөг бол шар тос 1 кг нь 60,000 төгрөгийн үнэтэй байна.
Энэ жилийн үзэсгэлэн худалдаа өмнөх жилүүдээс хэр хөл хөдөлгөөнтэй, худалдан авалт хэр байгааг худалдаа эрхлэгчдээс тодруулахад,
Худалдагч Д.Баярхүү: “Өнөөдөр өглөөнөөс хойш тасралтгүй хүмүүс ирж ааруул, сүүн цагаан идээ ихээр авч байгаа. Ялангуяа хэвийн ааруулаар зассан том багц авах сонирхолтой хүмүүс олон байна. Тийм болохоор бид өмнөх жилээс илүү их бүтээгдэхүүн бэлдэж ирсэн” гэв.
Худалдагч Ц.Оюу: “Худалдан авалт өмнөх жилтэй харьцуулбал маш муу байна. Манай бүтээгдэхүүний хувьд үнэд өөрчлөлт ороогүй ч хүмүүс хэвийн боов, еэвэнгээс илүү цагаа идээ, ааруул их сонирхож байна” гэж онцлон ярив.
Тэгвэл худалдан авалт хийж буй иргэн н.Бундантай цөөн хором ярилцахад “Тэтгэврийн зээлээ аваад л явж байна даа. Бараа бүтээгдэхүүний үнэ тэнгэрт хаджээ. Уг нь уламжлалт баяр ёслолоо өргөн тэмдэглэхийг боддог. Гэтэл тавгийн идээгээ л бүрэн дүүрэн бэлдэхэд дор хаяж 700-800 мянган төгрөг өлхөн зарцуулагдахаар байна” хэмээн тодотгов.
Үргэлжлүүлэн тэрээр “Хэвийн боов, ааруул, цагаан идээгээ авч, ууцаа чануулаад, архи, сархадын төрлийн зүйл авахгүй, элдэв чихэр, жимсгэнэ тавих ч мөнгө төгрөг хүрэлцэхгүй юм байна” гэж гартаа барьсан бэлэн мөнгөө тоолж ядан худалдан авалтаа үргэлжлүүлэв.
Ийнхүү сар шинийн баярын бэлтгэл хотод идэвхтэй өрнөж байгаа ч үнийн өсөлт, төсөв хязгаарлагдмал зэрэг нь олон хүний баярын ширээний сонголтод нөлөөлж буй аж.
