МБХ: Таваас дээш удаа ипотекийн хөнгөлөлттэй зээл авсан иргэн огт байхгүй

Өнгөрсөн 7 хоногт ипотекийн зээлийг 5-аас дээш удаа авсан 12 мянган иргэн байгаа талаарх мэдээлэл гарч, олон нийтийг бухимдуулаад буй. Тухайлбал энэ талаарх мэдээллийг УИХ-ын гишүүн Л.Энх-Амгалан "Ипотекийн зээлд хамрагдагсдын жагсаалт ил болно. Ипотекийн буюу зорилтот бүлэгт хүрэх нэн хөнгөлөлттэй зээлээр таваас дээш орон сууц авсан 12 мянга гаруй давуу эрх авсан иргэд байна" гэж хэлсэн. Эдгээр иргэдийн мэдээллийг ил болгохыг УИХ-ын дарга Н.Учрал хэлж байсан удаатай. Тэгвэл дээрх мэдээллийг Монголын банкны холбоо няцаажээ. 

Монголын банкны холбооны мэдэгдэлд 

"Сүүлийн үед олон нийтийн сүлжээгээр тархаад буй “Ипотекийн зээлийг 5-аас дээш удаа орон сууц худалдан авсан 12,000 иргэн бий” гэх эргэлзээ төрүүлсэн ташаа мэдээллийг албан ёсоор няцааж байна.

Монголбанкны эх үүсвэрээр 2013–2016 оны хооронд 1,584 иргэн давхардуулж зээл авсан байна. Таваас дээш удаа ипотекийн хөнгөлөлттэй зээл авсан иргэн огт байхгүй байна. Хөтөлбөрийн журамд 2016 онд оруулсан нэмэлт, өөрчлөлтийн дагуу Засгийн газар болон Монголбанкны эх үүсвэрээс санхүүжих хөнгөлөлттэй зээлийг нэг иргэн үндсэн зээлдэгчийн хувьд нэгээс дээш удаа давхардуулан авахыг хатуу хориглосон заалтыг оруулснаар олон удаа давтан авах боломж хууль, журмын хүрээнд байхгүй болсон.

Орон сууцны хөнгөлөлттэй зээлийн хөтөлбөр нь Монголбанкны баталсан холбогдох журам болон Санхүүгийн зохицуулах хорооны давхар хяналтад хэрэгжиж, сар, улирал тутам тайлагнагддаг, ил тод, хяналт тогтолцоотой. Олон нийтийн сүлжээгээр тараад буй мэдээлэл нь хууль, журмын хэрэгжилтийн бодит байдалтай нийцээгүй, ташаа ойлголт төрүүлсэн худал мэдээлэл болохыг хариуцлагатайгаар мэдэгдэж байна.

Сүүлийн үед эрх баригчид бодлого, зохицуулалтын алдаагаа хувийн хэвшилд тохож, хэвлэл мэдээллийн хэрэгсэл, олон нийтийн сүлжээгээр удаа дараа бизнесийн нэр хүндэд халдах буй явдалд мэргэжлийн холбооны зүгээс харамсаж байна" гэжээ.