Э.Батшугарын экс гэргий Т.Дарима эцэг эхдээ 23 жилийн турш хүчирхийлүүлж, санхүүгийн дарамтад байсан үнэнээ дэлгэж, шүгэл үлээлээ!

Экс Ерөнхийлөгч Н.Энхбаярын анхны бэр, ууган ач охиныг нь төрүүлсэн Т.Дарима “Гутал” ХК-ийн хувьцаа эзэмшигч С.Төмөрийн охин. Н.Энхбаяр баривчлагдах үед эдний гэрт ч нэгжлэг орсноор бийлэгжүү айлын охин байсныг бид мэдсэн. Пенсильванийн их сургуулийн харьяа Wharton хэмээх Ivy League-ийн сургуулийг дүүргэсэн бүсгүй Goldman Sachs хөрөнгө оруулалтын банкинд орсон анхны Монгол хүн.

Гаднаасаа амжилттай, өв тэгш бүсгүй бага балчир хүүхэд наснаасаа эхлэн 23 жилийн турш эцэг эхдээ зодуулж, хүчирхийлүүлсэн бөгөөд өдгөө 40 гарсан ч эцэг, эх нь эцэстээ түүнтэй хөрөнгийн маргаан хийж, сүүлийн 3 жилийн турш шүүхдэж байгаа аж. Т.Даримагийн тухайд гадаадад боловсрол эзэмшсэн төдийгүй дэлхийн хэмжээний банканд ажиллаж байсных “Гутал” ХК-даа цалин мөнгөгүй ажиллахын сацуу гаднаас хөрөнгө татах гэх мэтээр хувь нэмрээ оруулсан ч гэлээ эцэст нь эцэг эх нь төрсөн охинтойгоо хөрөнгө булаацалдаж, хууль шүүх дээрээ тулж болоогүй хүний хань, хүүхдүүдийн ээж болсон бүсгүйд гар хүрч, хүчирхийллээ үйлдсээр байгаа нь хүний ёс, монгол этик хаачсан бэ гэж асуухад хүргэж байгаа юм.

Тэр бүү хэл төрсөн ээж Ч.Долгормаа нь Т.Даримаг гэр оронгүй болгож, цалин санхүүгийн чадваргүй, төлөвшөөгүй ээж гэдэг шалтгаар 2 хүүхдийг нь булааж авах оролдлого ч хийж байжээ. Эцэст нь тэрээр үнэнийг дэлгэхээс аргагүй байдалд орсон бололтой, өөрийн фэйсбүүк хуудастаа шүгэл үлээсэн нь энэ. Нөлөө бүхий баян гэр бүлүүдийн хаалганы цаанаа чухам юу нуугдаж байгааг хэн ч мэдэхгүй. Т.Дарима Белгийн язгууртан Доминиктэй гэрлэн 2020 онд нижгэр хуримласан. Сайн муу сүлэлдэж сав дүүрнэ гэдэг л энэ байх.

Тэрээр нүүр хуудастаа “Хэдийгээр би хамгийн муу эцэг эхтэй юм шиг санагдаж, сүүлийн 23 жилийн хугацаанд хууль ёсны нөхөн төлбөрөө авч чадаагүй ч гэсэн орчлон ертөнц надад өөрийн гэсэн гайхалтай гэр бүлтэй болох боломжийг олгосонд би маш их талархаж байна. Тэдний өдөр тутмын золиослол, урам зоригийн ачаар би эцэг эхийнхээ 3 жилийн турш тасралтгүй хууль эрх зүйн, сэтгэл зүйн болон бие махбодийн дайралтыг тэсвэрлэж чадсан. Намайг олон удаа хөл дээр минь босгож, эмэгтэйчүүдийн эрхийн төлөө, хүчирхийлэлд өртсөн хүүхдүүдийн эрхийн төлөө, Монгол хүн бүрийн хүсч буй шударга, гэрэл гэгээтэй ирээдүйн төлөө тэмцэхэд урам зориг өгсөн охин Батшугарын Тара охиноороо би бахархаж байна” гэжээ.