НИТХ-ын шинэхэн дарга Д.Ихбаяр хурлаа хуралдуулж чадахгүй байна

“Шахмал түлш хямд байгаа учир утаа ихэссэн” хэмээн ярьж зогссон Д.Ихбаяр НИТХ-ын даргаар томилогдоод нэг сарын хугацаа өнгөрч байна. Энэ хугацаанд Нийслэлийн иргэдийн төлөөлөгчдийн хуралдаан ердөө хоёр удаа хуралдаж, 27 асуудал хэлэлцэхээс хоёр л асуудал хэлэлцсэн аж. Учир нь хуралдааны ирц бүрдэхгүй байгаагаас хэд хэдэн хуралдаан хойшилсон байна.

Зарим эх сурвалжийн мэдээллээр, Д.Ихбаярыг томилогдсоноос хойш НИТХ-ын төлөөлөгчид түүнийг “ажлаа мэдэхгүй” хэмээн шүүмжилж, хуралдаанд оролцох төлөөлөгчдийн тоо эрс багасжээ. Улмаар хэлэлцэх асуудлууд хойшилж нийслэлийн ажил гацаж буй нь удирдлагын хариуцлагын асуудал гэх шүүмжлэл хүчтэй өрнөж байна.

Угтаа НИТХ-ын даргын гол үүрэг нь Нийслэлийн 45 төлөөлөгчийг нэгтгэж, хуралдааны сахилга, зохион байгуулалтыг хангах байдаг. Гэтэл өнөөдөр НИТХ дээр эсрэг нөхцөл байдал үүсээд байна. Ирцээ бүрдүүлж чаддаггүй, хэлэлцэх асуудлаа цагт нь оруулж чаддаггүй, хурал удирдах чадвар сул байгаагаас болж нийслэлийн бодлогын шийдвэрүүд удааширч байгаа юм.

Д.Ихбаяр нь эрхзүйч, хэл шинжээч, Япон судлаач мэргэжилтэй. Түүний улс төрийн гараа Ардчилсан намаас эхлэлтэй. Харин хожим анхны ажлын хамтрагч, багын найз Н.Учралтай нэгдэж, МАН-д элссэн байдаг. Түүний улс төрийн карьераас гадна олон нийтийн анхааралд оруулсан нэг өнцөг нь 2021–2022 онд нийслэлийн ЗДТГ-ын Агаар, орчны бохирдол, ногоон байгууламж хариуцсан орлогч даргаар ажиллаж байхдаа “Иргэд үнэ хямд учраас сайжруулсан түлш их түлж байна” гэж хэлсэнтэй холбоотойгоор албан тушаалаасаа чөлөөлөгдөж байсан явдал юм. Улмаар 2024 оны орон нутгийн сонгуулиар Баянгол дүүргээс сонгогдож, НИТХ-ын төлөөлөгч, Нийслэлийн МАН-ын бүлгийн дарга, цаашлаад НИТХ-ын даргаар сонгогдон ажиллаж байна.

Ажлын туршлага:

2013-2014 Баянгол дүүргийн ЗДТГ, ГБХЗХХ-ын дарга

2008-2009 Их Засаг Олон Улсын Их Сургууль, Гадаад харилцааны мэргэжилтэн

2009-2013 Их Засаг Олон Улсын Их сургууль, Лицей сургуулийн захирал

2014-2016 Баянгол дүүргийн ЗДТГ, ЖДҮДТ-ын дарга

2016-2018 Сонгинохайрхан дүүргийн ЗДТГ, ХХҮХ-ын дарга

2020-2024 НИТХ-ын төлөөлөгч

2024-2026 хүртэл НИТХ-ын төлөөлөгч, Нийслэлийн МАН-ын Бүлгийн даргааар тус тус ажиллаж байжээ.