2026.02.25-ны 20:00 цагаас 26-ны 20:00 цаг хүртэл Хангай, Хөвсгөл, Хэнтийн уулархаг нутгаар цас орж, явган шуурга шуурч, зарим бүсэд -40 хэм хүрч хүйтэрнэ

Малчид, иргэд, тээвэрчдийн анхааралд: Ойрын өдрүүдэд нутгийн өмнөд хэсгээр салхи шуурга шуурч, зарим нутгаар эрс хүйтрэхийг цаг уурын байгууллагаас анхаарууллаа.

2026 оны хоёрдугаар сарын 25-ны 20:00 цагаас 26-ны 20:00 цаг хүртэл ихэнх нутгаар багавтар үүлтэй байх боловч Хангай, Хөвсгөл, Хэнтийн уулархаг нутгаар цас орж, явган шуурга шуурна. Салхи баруунаас секундэд 6-11 метр, өмнөд нутгаар секундэд 14-16 метр хүрч ширүүсэж, шороон шуурга шуурах төлөвтэй байна.

Агаарын температурын хувьд шөнөдөө Увс нуур, Дархадын хотгор орчмоор -34…-39 градус хүрч, бусад ихэнх нутгаар -22…-33 градус хүйтэн хонож, өдөртөө ихэнх нутгаар -8…-18 градус, говийн өмнөд хэсгээр +3…-2 градус байна.

Улаанбаатар хот орчимд үүлшинэ, цас орохгүй. Шөнөдөө -22…-30 градус, өдөртөө -13…-15 градус хүйтэн байх бол Багануур, Тэрэлж орчимд шөнөдөө -31…-33 градус хүрч хүйтрэх төлөвтэй байна.

Харин хоёрдугаар сарын 27-ноос гуравдугаар сарын 3-ныг хүртэл нутгийн зарим газраар цас орж, зөөлөн цасан шуурга шуурна. Салхи ихэнх хугацаанд секундэд 6-11 метр байх боловч Алтайн уулархаг нутаг, говь, тал, хээрийн бүсээр секундэд 15-17 метр хүрч ширүүснэ.

Энэ хугацаанд Увс нуур, Дархадын хотгор орчмоор шөнөдөө -35…-40 градус хүрч, өдөртөө -20…-25 градус байх бол бусад нутгаар шөнөдөө -10…-35 градус, өдөртөө +1…-20 градус хүйтэн байх төлөвтэй байна.

Иймд хүчтэй салхи шуурга, хэт хүйтрэлээс урьдчилан сэргийлж, холын замд гарахдаа тээврийн хэрэгслийн бүрэн бүтэн байдлыг хангах, мал сүргээ хамгаалахыг онцгойлон анхааруулж байна.