Н.Алтанхуяг: Миний хэрэг гэж байгаагүй. Одоо ч байхгүй

Нийслэлийн Эрүүгийн хэргийн давж заалдах шатны шүүхэд "Хөгжлийн банкны" гэх тодотголтой 42 хүн, 3 хуулийн этгээдэд холбогдох эрүүгийн хэргийн давж заалдах шатны шүүх хурал болж шийдвэрээ танилцууллаа. УИХ-ын гишүүн Н.Алтанхуягт холбогдох хэргийг цагаатгасан анхан шатны шүүхийн шийдвэрийг хүчингүй болгож шийдвэрлэсэн юм.

Уг асуудлаар УИХ-ын гишүүн Н.Алтанхуяг "Шүүхийн шийдвэрийг сайн ойлгоогүй. Ямар ч байсан гурав цагаадсан байна. Өнөөдөр хүчингүй болчихлоо. Бусад учрыг нь ойлгосонгүй. Миний хэрэг гэж байгаагүй. Одоо ч байхгүй. Мянга буцсан ч байхгүй. Улс төрийн л хэрэг яваад байгаа. Алтанхуяг гэдэг хүнийг явуулахгүй байх юм сан л гэдэг санаа. Хөлийг нь тушаад дөрвөн жил боллоо. Цаг хугацаа л аваад байна. Надад Хөгжлийн банкны удирдлагатай харилцах шаардлага байхгүй. Ямар ч харилцаа байхгүй" гэв.

Түүний өмгөөлөгч "Бидний зүгээс давж заалдах шатны шүүх энэ хэргийг буруу шийдвэрлэлээ гэж харж байна. Учир нь хэрэгт байгаа нотлох баримт нь хангалттай үндэслэлтэй нотлогдоогүй бол хэргийг хэрэгсэхгүй болгох заалттай. Гэтэл хэрэг дотор байхгүй баримт, материалыг шалгасангүй гэдэг үндэслэлээр хэргийг буцааж байна" гэв.