АН-ын бүлгийн даргад С.Баярцогтын талаас Б.Түвшин харин О.Цогтгэрэлийн фракцаас Х.Тэмүүжин нар өрсөлдөж байна

Өнөөдөр Ардчилсан намын Улс төрийн зөвлөл хуралдаж, Бүлгийн даргад нэр дэвшигчдийг тодруулсан билээ. Үргэлжлүүлэн эл асуудлаар АН-ын бүлэг хуралдаж байна.

Ардчилсан намын Бүлгийн даргад УИХ-ын гишүүн Х.Тэмүүжин, УИХ-ын гишүүн Б.Түвшин нар өрсөлдөж буй.

Тэгвэл Х.Тэмүүжин, Б.Түвшин нарын хэн нь хэн бэ?

Улс төрийн намууд дунд хагарал, хуваагдал цагийн цагт үргэлжилсээр байдаг нь нууц биш. Үүнийг нэг тод жишээ өнөөдрийн Ардчилсан намын бүлгийн даргын өрсөлдөөнөөс харагдаж байна. Тодруулбал, Ардчилсан намын гишүүд хоёроос гурван бүлэг фракцад хуваагдсан байдалтай байна. Тэдний нэг нь Ардчилсан намын дарга О.Цогтгэрэл, УИХ-ын гишүүн Ц.Туваан нарын тэргүүтэй “Нэг Монгол” нэртэй фракц. Энэхүү фракцын угшил нь “Нэг Монгол хөдөлгөөн” юм.

Дэлгэрүүлбэл, 2023 оны зургаадугаар сард УИХ-ын гишүүн Ц.Тувааны санаачлагаар “Нэг монгол хөдөлгөөн” гэгч байгуулагдаж, даргаар нь түүний дотнын найз Н.Ганибал томилогдсон байдаг. Харин энэхүү хөдөлгөөний нөгөө талд АН-ыг С.Эрдэнийн савраас салгаж, УДШ бүртгүүлж, тамгатай болгож өгсөн гэх С.Баярцогтын “Монде” нэгдэл үүсч байв.

Харин “Нэг монгол хөдөлгөөн”-д Х.Баттулгын “Хөх туг”, Увсын иргэдийн “Анчин”, “Од”, “Морьтон” фракцын зарим залуучууд, Ж.Батсуурь, Б.Пүрэвдорж, З.Нарантуяа нарын “Соёмбо” фракц, З.Энхболдын хүмүүсийн “Хангарьд” фракц нэгдсэн байдаг.

Энэхүү фракцын гол тоглогчдын нэг нь бүлгийн даргад өрсөлдөж буй УИХ-ын гишүүн Х.Тэмүүжин аж. Тэрбээр 2008 оноос хойш 18 жил УИХ-д сонгогдсон бөгөөд Хууль зүйн сайдаар хоёр жил ажиллаж байсан. Тэр бол улс төрийн хүрээнд хэнтэй ч нэг нийлж хаашаа ч хэлбийхэд бэлэн хүн. Улс төрийн хүрээнд түүнийг чөтгөртэй нөхцөхөд ч бэлэн хүн гэлцдэг. Түүний нэг тод жишээ нь 2020 оны УИХ-ын сонгуулиар намын гишүүнийхээ араас хутгалж С.Баярцогтын оронд гэнэт жагсаалтаар орж ирсэн нэгэн юм.

Тэгвэл Нэг Монгол фракцын эсрэг “Нэг Монгол ба бусад” фракциас УИХ-ын гишүүн Б.Түвшин Бүлгийн даргад өрсөлдөж байна. Энэхүү фракцын улс төрийн угшил нь Сангийн сайд асан Баярцогт бөгөөд нэмээд УИХ-ын гишүүд нэгдэж илүү жин дарж байгаа аж. Тэдний гол зориго нь Ардчилсан намыг “Нэг Монгол” фракцаас салгах явдал. Улмаар хэдий шинэ гишүүн ч гэсэн улс төрийн хор шар, амбиц байхгүй Б.Түвшинг бүлгийн даргад сойж байна. Түүний хувьд УИХ-ын сонгуулиар 29-р торгоос нэр дэвшиж сонгогдсон. Ажлын гараагаа "сахал" Д.Эрдэнэбилэгийн Худалдаа хөгжлийн бакны эдийн засагчаар эхэлж байсан намтартай

Б.Түвшинг өнөөгийн парламентад Ц.Элбэгдорж, С.Баярцогт нарын дэмжлэгээр сонгуульд нэр дэвших квот авсан хэд хэдэн хүмүүсийн нэг нь гэгддэг. Тиймээс С.Баярцогттой нийлж Нэг Монгол фракцыг дарж авахаар зүтгэж байгаа нь энэ. Тэр УИХ-д тойргоос сонгогдсон учраас бүлгийн дарга болох өндөр магадлалтай. Харин АН-ын бүлгийн даргаар Х.Тэмүүжин томилогдвол О.Цогтгэрэлийг бүлгийн даргаас буулгасны үр дүн гарахгүй гэсэн үг юм.

Бид бүлгийн даргын томилгооны талаар эргэн мэдээлэх болно.