"Автобусны жолооч хурд хэтрүүлэн урсгал сөрж явсан" гэж зорчигч нь ярьжээ

Улаанбаатараас Өмнөговь аймгийн чиглэлд зорчиж явсан "Hyundai universe" маркийн автобус "FAW" маркийн тээврийн хэрэгсэлтэй мөргөлдөж, гурван иргэн амиа алдсан харамсалтай хэрэг өнгөрсөн долоо хоногт гарсан.

Осолд орсон иргэдээс нарийн мэргэжлийн бүх төрлийн шинжилгээ авч, зарим иргэн ГССҮТ-д хэвтэн эмчлүүлж байгаа юм. Тухайн үед осол юунаас болсон талаар автобусанд зорчиж явсан "Монруд" ХХК-ийн ажилтан, "Ослоос өмнө автобусны жолооч хурд хэтрүүлээд байсан. Автобус мөртлөө хэд хэдэн автомашин гүйцэж түрүүлсэн. Тухайн үед нь өмнүүр сууж явсан хүмүүс жолоочид хурдаа тохируулж явахыг анхааруулж байсан. Гэсэн ч жолооч миний ажигласнаар хурдаа сааруулаагүй. Осол болох үед хурд хэтрүүлсэн мөртлөө урсгал сөрөөд явж байсан. Халтиргаа, гулгаа ихтэй уруу зам байсан болоод ч тэр үү өөдөөс том оврын машин ирж байгааг харсан ч гэсэн эгнээндээ орж амжаагүй байх. Өөрөөр хэлбэл, жолоодлогогүй явсан гэсэн үг. Тэгээд л том машины өөдөөс мөргөчихсөн" гэжээ.