Эхнэрээ хөнөөсөн Казахстаны сайд асан К.Бишимбаев өмнөх эхнэр, хүүхдүүдээ удаа дараа хүчирхийлж байжээ
Өнгөрөгч 2023 оны 11 дүгээр сард Астана хотын "Бау" ресторанд амь насаа алдсан Салтанат Нукеновагийн хэрэг дэлхий нийтийг цочроогоод байна. Учир нь түүнийг өөрөөс нь 12 насаар ах, Казакстаны Эдийн засгийн сайд асан нөхөр Куандык Бишимбаев 8 цагийн турш зодож, тамлан хөнөөсөн аймшигт хэргийн материалууд энэ өдрүүдэд ил болж байгаа юм.
Казахстаны Эдийн засгийн сайд асан Куандык Бишимбаевт холбогдох хэргийн шүүх хурал 16 дахь өдрөө үргэлжилж байна.
Куандык Бишимбаев өмнө нь хоёр удаа гэрлэж байсан, хоёр хүүхэдтэй. Гурав дахь эхнэр болох Салтанатыг инстаграмаар анх харснаасаа хойш 6 сарын турш уулзах, болзох оролдлого хийж уйгагүй эргүүлсэн. Гэвч Нукенова эхэндээ түүнтэй уулзмааргүй байгаагаа найзууддаа ярьж байсан. Улмаар 2022 оны зун түүнтэй уулзахыг зөвшөөрч, удалгүй гэрлэжээ. Бишимбаев гэрлэснээсээ хойш түүнд гар хүрч, гарч орохыг хориглон, өөрийнхөө хяналтад байлгах болсон. Эцэст нь гэрлэсэнээсээ хойш 9 сарын дараа буюу 2023 оны 11 сард эр нөхрийнхөө гарт харамсалтайгаар амиа алдсан. Хэрэг гарсан өдөр тэрбээр нөхрөөсөө салах хүсэлтэй байгаагаа хэлсний улмаас Куандык Бишимбаев түүнийг үеэлийнхээ рестораны VIP өрөөнд 8 цагийн турш зодож, аминд нь хүрсэн.
Шүүх хурлын үеэр Салтанат Нукеновагийн ээж Жумагул Нукева Казахстаны сайд асан Куандык Бишимбаевыг “Өмнө нь удаа дараа эхнэр, хүүхдүүдээ хүчирхийлдэг байсан” талаар мэдээлсэн байна. Үүнтэй холбоотойгоор яллагдагч өмнө нь эхнэр, хүүхдүүдээ удаа дараа хүчирхийлж байсныг Мөрдөн байцаах албанаас шалгахаар болсон талаар Казахстаны Дотоод хэргийн дэд сайд мэдэгджээ.
