"The Hu" хамтлаг Улаанбаатар хотод бүрэн хэмжээний тоглолтоо хийнэ

"The Hu" хамтлаг эх орондоо, тэр дундаа Улаанбаатар хотод бүрэн хэмжээний тоглолтоо хийхээр болжээ. Тодруулбал, тус хамтлагийнхан ирэх долдугаар сарын 10-нд "Hit park"-д тоглолтоо хийх аж. Эл тоглолтын ерөнхий продюсероор Халзаа буюу М.Даваасүрэн, ерөнхий найруулагчаар "Skin" энтертайнментын найруулагч Б.Анар ажиллах юм.

2016 онд байгуулагдсанаасаа хойш “The Hu” хамтлаг нь Монголын соёлын биет бус өв, уламжлалт хөгжмийн хэв маяг, элементүүдийг орчин үеийн рок, хүнд металл хөгжимтэй хослуулсан хүннү рок хөгжмийн урсгалаар уран бүтээл туурвиж буй. Тэд анхны цомгоо 2019 онд “Гэрэг” нэртэйгээр гаргасан. Удаах цомог “Rumble of thunder”-аа өнгөрсөн 2022 онд худалдаанд гаргасан билээ. Шинэ цомогт нь "Учиртай гурав", "Шихихутаг", "Татар дайчин", "Хар аянга", "Байгаль эх" гэх мэт нийт 13 дуу багтсан юм. Тэд Монгол уран бүтээлчдээс анх удаа Их Британийн "Топ 100" дууны жагсаалтад багтаж, "Оддын дайн" уран зөгнөлт киноны видео тоглоомд дуу нь сонгогдож, Америкийн "Биллбоард"-ын жагсаалтыг "Гэрэг" цомгоороо тэргүүлсэн зэрэг олон олон амжилтын эзэн юм.

Ташрамд дурдахад, "The Hu" хамтлаг эх орондоо хийх удаах тоглолтоо ирэх долдугаар сарын 20-нд Архангай аймгийн Цэцэрлэг сум дахь "АRА" фестивалийн үеэр толилуулна.