Өнөөдөр Элон Маскийн төрсөн өдөр
Энгийн л гарааны бизнесээс дэлхийн технологийн магнат болтлоо хөгжиж чадсан, тэрбумтан Элон Маск Өмнөд Африкт 1971 оны энэ өдөр энгийн гэр бүлд төрсөн бөгөөд аав ээж хоёр нь багад нь хоёр тийш болсноор аавынхаа дэргэд өсжээ. Тэрбээр 12 настайдаа анх “Бластар” нэртэй тоглоомын программ бичиж, түүнийгээ 500 доллараар худалдсанаар энэ төрлийн бизнес эхлэх санаа төрж, 13-тайгаасаа хувьцааны бизнест хөл тавьжээ.17 нас хүрэх үедээ Хатан хааны их сургуульд суралцахаар Канадыг зорьсон байна. Тэнд хоёр жил сураад Пенсильванийн их сургуульд бизнесийн удирдлага, физикийн ухааны тэнхимд шилжин суралцжээ. Дараа нь Стэнфордын их сургуульд докторын зэрэг горилохоор очсон ч хоёр хоноод л залхаж, бизнес эхлүүлэхээр шийдсэн аж.
Ийнхүү 1996 онд ахтайгаа хамт “ZIP2” нэртэй старт-ап компаниа байгуулж, программ хангамжийн чиглэлээр үйл ажиллагаа явуулдаг байсан ба гурван жилийн дараа 302 сая ам.доллароор “Compaq” компанид заржээ. 1999 онд “XCom ” /хожим Paypal болсон/ компаниа үүсгэн байгуулсан бөгөөд үйл ажиллагаа жигдэрч, хувьцааны үнэ хурдацтай өссөнөөр 2002 онд “eBay” компанид 1.7 тэрбум ам.долларын үнэд хүргэн зарж чадсанаар 160 сая ам.долларыг өөрийн болгов. 2002 онд “SpaceX”-ээ байгуулсан бөгөөд 2003 онд өөрийн биширдэг алдарт зохион бүтээгч Николас Теслагийн нэрээр нэрлэсэн “Tesla Motors”-оо байгуулсан юм. Мөн 2006 онд нарны эрчим хүчийг ашиглах чиглэлээр үйл ажиллагаа явуулдаг “SolarSystem” компанийн өндөр хөрөнгө оруулагч болжээ. Түүний өнөөгийн нийт хөрөнгө 178 тэрбум ам.доллароор үнэлэгдэж буй.
