Өвлийн инээмсэглэлд “3 охин” бут авлаа
Өдгөө 62 дахь жилтэйгээ золгож байгаа “Сүлд модны наадам” дуу Б.Зангад гуайн дуулсан хувилбараар олон нийтийн сэтгэлд хоногшсон. Сүүлд харин “3 охин” хамтлаг поп хатагтай Б.Сарантуяатай хамтран амьд хөгжимтэй дуулсан нь тунчиг ёслол төгөлдөр донжтой болжээ. Чанга л хашгирч байвал чадалтай дуучин, олон хэмнэл нэрвэл онцгой дуу бүтнэ гэсэн уриатай мэт шинэ үеийнхний хэмнэлд тэд цоо шинэ өнгө төрхөөр хариу барив. Ямар намуухан, сонсголонтой, тайван сайхан дуулаа вэ. Өвөл угаасаа нэг тийм дөлгөөн тайван улирал билээ.
Тэд мэргэжлийн байна, хоолой гоё байна.
Хамгийн эрчимтэй уран бүтээл хийж байгаа Г.Анхмаа нь хэдийнэ өөрийн донж маягаа олсон. Өөгүй цэвэрхэн будалт цагаан голдуу өнгөгүйгээр энэ бүсгүйг төсөөлөхийн аргагүй. Нөгөө хоёрыгоо бодвол хожуу олны танил болсон ч оройхон гараад ширүүхэн дайрсан билээ. Харин “Зүрх чам руу” дуун дээрээ Б.Амархүүгээ жийж Наагийтай дууллаа. Тухайн үед Г.Анхмаа Б.Амархүү нарыг бие биедээ дурласан гэж ч шуугиж байв даа. Одоо хань ижилтэй болсон бүсгүйд чимэг зүүлт хэрэггүй мэт.
“Худалдаа хөгжлийн банк”-ны хамаг том захирал О.Орхон хайртай бүсгүйнхээ хобби, хүсэл мөрөөдлийг харамгүй дэмждэг нь уран бүтээл, клипнийх нь чанар чансаанаас харагддаг. Хосууд дундаасаа нэг хүүхэдтэй. Г.Анхмаа 1, О.Орхон 3 хүүхэдтэй гэхээр хосууд нийт 5 хүүхдийн ээж аав, өнөр бүл.
Д.Солонгын тухайд “Монгол Хьюндэй” компанийн захирал О.Энхмандахтай гэрлэн өөрөө ээж болохоосоо өмнө эмээ болсон. Учир нь О.Энхмандах захирлын охин нь аавыгаа өвөө болгосонтой холбоотой. Д.Солонго эмээ болсныхоо дараа ээж болсон.
Харин Х.Ану өөрөөсөө дүүмэд хувиараа бизнес эрхэлдэг залуутай гэрлэн хоёр хүүхэдтэй болоод байгаа. Хамтлагийнхан дотроо хамгийн дуулиангүй амьдардаг нь юм уу даа. Хувцаслалтын хувьд Г.Анхмаа хамгийн тансаг нь Д.Солонго гоёмсог Х.Ану илүү галбираа тодотгожээ. Хэдийгээр нэг хамтлаг ч гэсэн хэв маяг, имижээ өөрсдөө бүрдүүлж хувцаслалтаа шийддэг биз.
Бүгд гэрлэчихээр хувцаслалт өнгө зүсээр нь бараг л нөхрүүдийнх нь түрийвчний хэмжээг харж байна шүү. Дуучин болгонд ингэж амьд хөгжимтэй дуулах үнэ цэнтэй клип хийх мөрөөдөл байдаг. Тэд чадлаа. Тэдэнд гоо үзэсгэлэн, мэргэжлийн дуулалт, хоолойны цар хүрээ, мэдрэмж байна. Магадгүй “3 охин”-ы дараагийн level энэ биз.
Ер нь хамтлагийн гишүүд салж хэчнээн мөнгөөр зодсон ч хамтдаа байсан амжилт, хамтдаа бүтээх орон зайг гүйцдэггүй бололтой. Тэд нэг өдрийн дотор шинэ жилд зориулсан special дуунуудаа ар араас нь цацаж бараг л онлайн тоглолт тавьчихлаа. Bravo!
