Монгол Улсын Гавьяат жүжигчин, дуучин Т.Ариунаа “ЗҮРХ АСНА” тоглолтоо 2025 оны наймдугаар сарын 23-нд Төв цэнгэлдэх хүрээлэнд зохион байгуулна.

Хүнийг анх төрөхөд нь юуны төлөө амьдрах ёстойг заасан бэлэн жор байдаггүй гэдэг. Харин амьдралаа юунд зориулж, юуны төлөө оршихоо хүн өөрөө тунхаглаж, авьяас билгээ нээн нийгмийнхээ сайн сайханд хувь нэмэр оруулахаа өөрөө шийддэг гэдэгт би итгэдэг.

Би бол аав, ээж, эрдэмт багш, сурган хүмүүжүүлэгчдийн урлаж бүтээсэн, түүнийг нь өөрийнхөө хичээл зүтгэлээр үргэлжлүүлэн зурсан уран бүтээлч хүн.

Тайзан дээр дуулахдаа ч, уран бүтээлээ туурвихдаа ч, эгэл амьдралыг туулахдаа ч шударгаар хөдөлмөрлөж, тууштай, тэмүүлэлтэй, зоригтой байх зарчмыг баримталж, ямар ч үед зөв сэдлийг үнэт зүйлээ болгон хөдөлмөрлөж ирсэн.

Оролдлого сайт оройд нь гэдэг философиор үйлээ удирдан, уран бүтээлээрээ бусдад баяр хөөр, ухаарал, сэтгэлийн тэнхээ, амар амгаланг өгөхийг зорьсон. Өөрөөрөө урлагийн хүн, уран бүтээлч ямар байхыг үлгэрлэж, бусдад урам зориг өгөхөөр шаргуу ажиллаж, урлагийн салбарт 40 жил амьдарчээ. Урлаг бол хариу нэхэхгүй хайранд үг, аялгууг уусгаад сэтгэлийг тунгалагшуулахаар уулгадаг рашаан хэмээн би сэтгэдэг. Ийм учраас урлаг надад эмх цэгцтэй, ёс зүйтэй, нийгэмд зөвөөр нөлөөлж, бусдад сайнаар хандахыг заасан байх.

Өнөөдрийг хүртэл амилуулан эгшиглүүлсэн аялгуут дуугаараа амьдралын бүхий л нандин сэдвүүдийг хөндөж, сэтгэл гундуу яваа нэгний урагшлах шалтгаан болж, урам зоригтой нэгний улам асах гал нь болж, алдаж яваа хүний тулах таяг нь болж, ухаарч хөгжих хүнд итгэл, зориг нэмэх гэж бүтээлч хандлагыг өөртөө төлөвшүүлж, тууштай, үнэнч, оюуны хувьд цуцашгүй, эрэл хайгуулд эцэшгүй дуулсаар ирэхдээ бяцхан үрс хайрлагдах ёстойг ч мөн бусдад сануулж уран бүтээлээ туурвисаан..

Бид бүтээл төрүүлдэг шигээ бүтээлээсээ ч өөрсдөө дахин төрдөг.

Урлагийг ойлгож, түүгээрээ дамжуулан бусдад юу өгөхөө мэддэг байх нь үнэхээр гайхалтай. Энэ бол уран бүтээлч хүний уран бүтээлээ үргэлжлүүлэн хийх цор ганц шалтгаан юм.

Өөрийн хүсэл, таашаал, нэр алдрын төлөө явах нь урлагт ажилладаг хүний мөн чанар огтоослл ч биш. Харин чанартай уран бүтээл туурвиж, эерэг, зөв хандлагыг өөртөө оршоон, юуны төлөө үүнийгээ хийж байгаагаа ухамсарлаж тууштай, сахилга баттай, эмх цэгцтэй сэтгэлгээг дээдлэх үзэл маш чухал .

Намайг энэ хүртэл үгээр далавч хийж, аялгуугаар дэвэн хөөрч, өндрийн өндөрт нисгэж сонсогч олонд хүргэсэн илч, түлш бол үг зохиогч, ая зохиогч, хөгжмийн найруулагч, продюсер, бүжигчид, дуучид, тоглолтын найруулагчид, загвар зохион бүтээгч, нүүр будагч гээд он жилүүдийн туршид, цаг, үе болгонд сонгогдож ажилладаг уран бүтээлчид та нар билээ. Аль нэг нь үгүй бол угаас бүтээл төрөх ч боломжгүй. Тиймээс та нартаа би баярлаж буйгаа хэлэхийг хүсэж байна.

Хэдийгээр уран бүтээл төрлөө ч түүнийг өлгийдөн авч олон арван жил амьд оршоодог үзэгч, сонсогч, дэмжигчид үгүйсэн бол би дуулавч цуурай үгүй, бүживч биелгээ үгүй болох байсан. Та нартаа мөн талархаж байна. Хэвлэл мэдээллийнхэн та нар бол миний хэн байсныг сануулж, хэн байх ёстойг мэдрүүлж, ирлэн хурцалж, ёс зүйн хэм хэмжээг сахиулдаг чухал үүрэгтэй хүмүүс учраас талархлыг минь хүлээн авна уу. Мөн зөвийг таниулж зөвлөж дэмжиж ирсэн оунлиг, эрдэмлэг хүмүүстээ баярлалаа.

Ээжийгээ санан хүлээж өөрсдөд нь зарцуулах хугацаанаас хэлтэлж ард түмэнд зориулах боломж, зөвшөөрлийг олгосон хөвгүүддээ баярлалаа.

Намайг ойлгож итгэдэг, оюун санааны эрх чөлөөг өгч, урлагаар дамжуулан нийгэмдээ хувь нэмэр оруулах үйлсэд тусалж ирсэн, мөн ямар ч үед үнэт зүйлээ авч үлдэхэд, зарчмаасаа хазаалгүй алхахад түшиж, тулж, тэвэрч тайвшруулж байсан ханьдаа талархаж байна.

Ингээд эцэст нь өвчнийг тэсвэрлэхийн сэтгэлийн хатыг таниулж, үхлийн өмнө нүүр тулахдаа ч ямар их хатуужилтай байхыг би ээжээсээ ухаарч үлдсэнээ дурдмаар байна. Энэ бол миний амьдралдаа харсан хамгийн аймшигтай агаад хамгийн гайхамшигтай мөч. Үүнээс илүү хатуу зовлон өөр хаана байхыг би энэ амьдралдаа хайгаад олоогүй ээ. Нэгэнт үхэл хагацал, тэсэхэд бэрх өвчнөөс өөр зовлон үгүй юм бол хүмүүс бид юунд шантарч, юунд няцах билээ. Тиймээс бид уйлан уруудах, гунин гутрахыг сонгож яах юм. Шийдвэрлэх боломжгүй асуудал эдгээрээс өөр байна гэж үү.

Яг л үүнийг хүний хань ямар байдгийг, гэр бүл хамтдаа хэрхэн цөмөрч унадгийг, тэр доороос нэгнээ яаж татан дээшилдгийг, гэр бүлээ хадгалж хамгаалахын мөн чанарыг би урт удаан үргэлжилсэн хугацаанд ойлгож авсан. Энэ бол хичээж чадвал гарц нь хаа нэгтээ байдаг асуудал болохоос зовлон биш байж.

Намайг гомдоож, шархлуулсан хүмүүсийг үзэн ядахын оронд би дахин шинээр өөрийгөө урлаж тэнгэр өөд толгойгоо өргөсөн. Сорилт бэрхшээл бол уналт биш, энэ бол бидэнд өөрийгөө дахин шинээр бий болгоход зориулагдсан томъёог нь олоод бодчихдог бодлого байж. Олон ч янзын гутаан доромжлол, гүтгэлгийн ард нулимстай, инээмсэглэлтэй туучиж барсан уртын урт замыг орилж, хашгираад ч сонсохгүй тэр их хуурамч үгсийн эсрэг чимээгүй, тэвчээртэй, зоригтой давсан 40 жилийнхээ өрнөлөөс бий болсон ухаарлаа та бүхэнтэйгээ товчхон хуваалцлаа.