Дижитал сурталчилгаа (digital ads) яагаад чухалд тооцогдох болов?
МакКинзэйгийн тооцоолсноор дижитал зар сурталчилгааны орлого 2022 онд 520 тэрбум доллар байсан бол 2040 он гэхэд хамгийн багадаа 2.1 их наяд буюу жилийн өсөлт нь 8-10% байхаар байна. Энэхүү өсөлтийн ихэнх хувь нь зар сурталчилгааны зардал нь уламжлалт сурталчилгаанаас дижитал медиад шилжсэнээс үүдэлтэй. Жишээлбэл 2022 онд дижитал зар сурталчилгаа нийт зах зээлийнхээ 65 хувийг эзэлж байсан бол 2040 он гэхэд 80-90 хувьд хүрэхээр байна
Тэгвэл яагаад дижитал адс Ирээдүйн өрсөлдөөний 18 талбарын нэг гэгдтэлээ чухалд тооцогдох болов?
1. Онлайнаар холбогдож буй хүмүүсийн тоо нэмэгдэж, дундаж давхарга өргөжиж байна
Хүмүүс дижитал орчинд нэвтрэхийн хэрээр онилж болох хэрэглэгчдийн тоо нэмэгдэж, зар сурталчилгаагаар хүрэх боломжтой хүмүүсийн хүрээ томорч байна.
2023 онд Энэтхэгт 850 сая хүн онлайнд байсан бол 2025 онд 1.1 тэрбумд хүрнэ гэсэн таамаг байна. Энэ бол нэг улсын доторх Facebook, TikTok, YouTube-ын дижитал контент хэрэглэгчид хурдтай тэлж буйн илэрхийлэл. Монголд ч ялгаагүй TikTok хэрэглэгчдийн тоо 2020 онд 300 мянга байсан бол 2024 онд 1.2 саяд хүрсэн. Хамгийн гол нь энэ өсөлтийн 70% нь 18–35 насныхан бөгөөд тэд бол бидний гол потенциалтай худалдан авагчид.
2. Хүмүүс улам олон цагийг дижиталд зарцуулж, донтох нь нэмэгдэж байна
Хүмүүс гар утсаа гарнаасаа огт салгахаа болив. Утсаа хаяснаас түрийвчээ хаясан нь дээр гэдэгтэй бүгд санал нийлдэг болсон. Ингэснээр энэхүү хүмүүсийн хэрэглэдэг сошиал медиа, үздэг видео, лайв, сонсдог подкаст, хэрэглэдэг чат зэрэг контент төрлүүд дунд сурталчилгаа явуулах хэлбэрүүд үр дүнтэй болж байна.
Дэлхийд TikTok, YouTube Shorts зэрэг богино видео платформ дээр зар сурталчилгаа хийх нь тренд болж байна. Монголд Инфлюэнсэр подкаст, лайв зар, reels ads, хэрэглэгчийн үүсгэсэн контент (UGC) сурталчилгаа ихэссэн. Подкастуудын дундуур гардаг story хэлбэрийн брэнд интеграци бол маркетеруудын хувьд шинэ формат. Зөвхөн үзүүлээд өнгөрдөг үе ард хоцорч, хэрэглэгчидтэйгээ цуг сурталчилгаа бүтээгээд, өөрсдөөр нь түгээлгээд, яриулах боломжтой болж байна.
3. Дижитал шилжилт нь дэвшил авчирч, контент бүтээх зардлыг огцом бууруулж байна
AI бол маркетеруудын шинэ зэвсэг. Хэрэв танд Canva, ChatGPT, Midjourney байхад та ганцаараа бүтэн creative багтай тэнцэхүйц контент бүтээж болно. Coca-Cola “Create Real Magic” кампанит ажилдаа AI ашиглаж, хэрэглэгчдээр өөрийн постерыг хийлгэсэн. Зардал нь уламжлалт агентлаг ашигласнаас хэд дахин бага мөртлөө үр дүн өндөртэй болсон нь зүгээр л нэг дохио. Жижиг бизнесүүд өөрсдөө poster, постын тайлбар, видео зохиол зэргийг ChatGPT, Canva AI, CapCut AI-аар хийчихэж байна. Нэг анхаарах зүйл нь маркетинг, сурталчилгааны зардал багасахын хэрээр бүх бизнес маркетингийн контенторхуу юм хийж чаддаг болж, зар сурталчилгааны эрэлт улам нэмэгдэж байна. Тэгэхлээр стратеги, бүтээлч байдал болон ялгарлаараа л өрсөлдөх нь.
4. Зар сурталчилгааны байршуулж болох газрууд улам олон болж байна
Зөвхөн Facebook-ийн бүүстээр биш бараг бүх л газар буюу киоск дэлгэц, POS машин, QR код, мессеж, UBCab-ын homescreen, банкны апп, дижитал хэтэвчүүд гэх мэт бүгд зар сурталчилгааны шинэ байршил болж хувирч байна.
Бразилын утасны оператор TIM нь хэрэглэгчийн дата хэрэглээнд үндэслэн утасны мессеж, апп доторх сурталчилгаа явуулж эхэлсэн. Телеком салбар өөрөө Ads Media Platform болж хувирч байна. Монголд харагдаж буй өөр нэгэн жишээ нь Tom n Toms-ын POS дэлгэц дээр Boost.mn гэсэн талбар байхыг анзаарсан л байх. Boost нь тухайн плэйсмэнтүүдийг гэрээлэн авч сурталчилгаа нийлүүлж байна, ингэснээр бид тус тусдаа холбогдон гэрээлэх бус нэгдсэн нэг компанитай холбогдон, дашбордоороо сурталчилгаагаа хянах боломжийг бүрдүүлж байгаа хэрэг юм. Энэ болгон бидний зар сурталчилгаагаа хүргэх байршлуудын боломжийг тэлж, зар сурталчилгааны санал, мессежээ байршилд суурилж санал болгохыг дэмжиж буй хэлбэр юм.
Дижитал маркетер Б.Саруулбаяр
