С.Баярцогтын эсрэг тэмцэнэ гэж байсан Л.Мөнхбаясгалан АН-ын дэд даргын сэнтийд “цадав”

Өчигдөр /2026.05.06/ Ардчилсан намын Үндэсний бодлогын хорооны 69 дүгээр хуралдаан болж тус нам Ерөнхий нарийн бичгийн дарга болон дэд дарга нараа сонголоо. Тэд дуу нэгтэйгээр Гранд Монгол фракцын тэргүүн, Сангийн сайд асан С.Баярцогтыг Ерөнхий нарийн бичгийн даргаараа жинхэлж, харин дэд даргаар Л.Мөнхбаясгалан, Д.Энхтуяа, П.Мөнхтулга, Н.Ганибал, Ч.Өнөрбаяр нарыг батламжилсан.

Хурал болгон дээрээ шахуу зодолддог тогтсон гэмээр соёлтой Ардчилсан намын өчигдрийн хуралдаан урд хожид үзэгдээгүй эв түнжинтэй, уярч хайлсан гишүүдтэй хуралдаан болж өндөрлөв. Үеийн үед хурал бужигнуулж явдаг лайвчин Д.Мөнх-Эрдэнэ хүртэл хүний хайлан болчихсон инээд алдан явсан гэхээр хэр соёлтой сайхан хурал болсныг илтгэнэ.

Шалтгаан нь маш тодорхой. Эцсийн мөчид намын дарга О.Цогтгэрэл улстөрчийн ухаан зарж, албан тушаалын бялуу хуваахдаа эхийг нь эцээж, тугалыг нь тураахгүй фракцууддаа эн тэгш хуваарилж, тохиролцсонтой холбоотой. Гишүүд нь ч зүсэм бялуундаа цадсан явдал байлаа.

Ганцхан жишээ дурдъя. УИХ-ын гишүүн Л.Мөнхбаясгалан эл хуралдаанаас долоо хоногийн өмнө “Сангажавын Баярцогтыг Ардчилсан намын Ерөнхий нарийн бичгийн даргын үүрэг гүйцэтгэгчид санал болгожээ. Хэрэв ингэх юм бол АН-ын жирийн гишүүдээ уриалан тэмцэлд гарна даа. С.Баярцогтоос болж нам ялагдахыг хэрхэвч хүлээн зөвшөөрөхгүй! Энэ нөхөр АН-ыг 2027 оны Ерөнхийлөгчийн сонгууль, 2028 оны УИХ-ын сонгуульд ялагдуулах зорилготой, хэвтүүлж өгөх даалгавартай. Эх орноо зарсан энэ урвагчаас юу хүлээх юм бэ. С.Баярцогтыг АН-ын генсек болгохгүйн тулд бүх чадлаараа эсэргүүцнэ” хэмээн эрс шийдэмгий мэдэгдэж байв.

Гэтэл өчигдрийн хуралдааны дараа хэвлэлд мэдээлэл өгөхдөө “Олонхийн шийдвэр гарсан учраас хүндэтгээд С.Баярцогтыг дэмжиж ажиллана” гэсэн юм. Энэ л бялуу хуваалтын үр дүн. Тэр АН-ын дэд даргын сэнтийдээ сэтгэл цаджээ.

Одоо Ардчилсан намд Бүлгийн даргаа сонгох ажил үлдсэн. Бүлгийн даргад УИХ-ын гишүүн О.Тэмүүжин, Б.Түвшин нар өрсөлдөж буй. Шийдвэр ерөнхийдөө тодорхой болсон. “Гранд Монгол” буюу С.Баярцогт генсекээ авсан учир “Нэг Монгол” буюу Х.Тэмүүжин намын бүлгээ авах нь тодорхой болоод байна.

Үргэлжлээд Ардчилсан намын улс төрийн нөхцөл байдал ч том зургаараа ил боллоо. Урьдчилсан прогнозоор бол АН-ын шинэхэн генсек С.Баярцогт Ерөнхийлөгчийн сонгуульд хүч үзэх магдалал өндөр. Гэхдээ намын гишүүд нь түүнийг улс төрийн ухаалаг стратеги боловсруулж, 2027 оны Ерөнийлөгчийн сонгууль болон 2028 оны УИХ-ын сонгуульд Ардчилсан нам ялалт байгуулна гэсэн их итгэл тээж буй.