МАН-ын дэргэдэх "Ардын хүч" фракц намын их хурлыг албан тушаалаар барьцаалж байна хэмээв
Өнөөдөр МАН-ын дэргэдэх “Ардын хүч” ТББ-аас хэвлэлийн хурал хийж намын УЗ-ийг хуралдауулж, түүнээс Бага хурлыг товлох, Бага хурлаараа Их хурлаа товлон хуралдуулах шаардлагыг тавьж буйгаа албан ёсоор илэрхийлэв. Тус холбооны тэргүүн Б.Амарсанаа хэлэхдээ "Аль зуны эхэн сард Засгийн газар огцорч, шинээр байгуулагдсан. Зунжингаа найр наадам хийцгээж, амарцгаалаа. Одоо улс орныхоо амьдралд анхаарлаа хандуулцгаая.
Бүх намууд их хурлаа хуралдуулж, бүтэц зохион байгуулалтаа хэлэлцэх үүрэг хүлээсэн. Харамсалтай нь манай намын хурал тодорхойгүй шалтгаанаар хойшилсоор байна. Ээлжит хурлаа товлож зарлаж чадахгүй байдалд манай нам анх удаа орж байна. Үүнээс хамаарч намын гишүүд эргэлзэх, удирдлагадаа итгэл алдах явдал даамжирч байна. Иймээс бид ойрын хугацаанд УЗ-ийг хуралдуулж, түүнээс Бага хурлыг товлох. Бага хурлаараа Их хурлыг товлох шаардлагыг тавьж байна. Эдгээр хурлаар улс орны ирээдүйг ч ярих ёстой. Намын их хурлыг албан тушаалаар барьцаалах, хууль бус үйлдлээ замхруулах байдлаар гацаах оролдлого явж байна уу хэмээн бид хардаж байна” хэмээгээд “Ардын хүч” холбооны төлөөллөөс намын дарга Л.Оюун-Эрдэнэ, генсек Я.Содбаатар нарт шаардлага хүргүүлэхээ мэдэгдлээ.
Эндээс үзвэл МАН-ын дотоод хагарал чинээндээ тулж, тогооноосоо нэгэнт хальжээ. Учир нь Ардын хүч холбооны тэргүүн Баатарын Амарсанаагийн тухайд МАН-ын дотор эрх мэдлийн шилжилт, хуваарилалт болох тоолонд жигүүр ургуулж, фракц байгуулж, бослого өдөөдөгөөрөө алдартай нэгэн. Тухайлбал, тэртээ 2013 онд Ж.Эрдэнэбат, Л.Оюун-Эрдэнэ, Д.Амарбаясгалан намын архагууд, Н.Номтойбаяр, О.Содбилэг нарын хунтайжууд, Т.Аюурсайхан, Б.Ганхуяг нарын “нүүрсчид”, өдгөө бараг “шувуу” болсон Ж.Мөнхбат тэргүүтэй залуус “Шинэчилье” хөдөлгөөн өрнүүлж, намаа бойкотолж байхад гол рольтой давхиж явсан эр. Хожмоо намаасаа хөөгдсөн. Шалтгаан нь Д.Амарбаясгалан, Л.Оюун-Эрдэнэ нарын утсан хүүхэлдэй МАН-ын Хяналтын хорооны даргаа, одоогийн УИХ-ын гишүүн Я.Баярбаатар чухам дарга нарынхаа захиалгаар түүнийг замаасаа зайлуулж байсан гэдэг. Тэр цагаас хойш хувийн бизнестээ анхаарал хандуулж, нам төрийн ажлаас хөндийрсөн Б.Амарсанаа гэнэт гарч хэвлэлийн хурал хийж, тэгэх тусмаа Л.Оюун-Эрдэнийг албан тушаалаараа барьцаалан хууль бус үйлдлээ замхруулах байдлаар Намын Их хурлыг гацааж байна хэмээн ил шулуухан хэлсэн нь ил далд сүжрээд буй Л.Оюун-Эрдэнэ болон Д.Амарбаясгалан нарт Том ахын зүгээс өгч буй сануулга, бүхэлдээ төр эргэж буйн дохио гэж болно.
Уг нь намын УЗ хуралдаж, Бага хурлынхаа товыг өнгөрсөн 8 дугаар сарын сүүлээр товлоно гэж байсан боловч Ерөнхийлөгч У.Хүрэлсүхийн тал огцорсон Ерөнхий сайд Л.Оюун-Эрдэнэ болон УИХ-ын дарга Д.Амарбаясгалан нар хэн нь намаа авч, хэн нь генсекээ авах тухайд тохиролцож чадахгүй өнөөдрийг хүрсэн учраас хурлын товоо зарлаж чадахгүй өнөөдрийг хүрээд байгаа билээ.
Эцэст нь намын Бага хурал дотор нөлөө бүхий спикер Д.Амарбаясгалан өнөөдөр Казакстан улсыг зорьсон, У.Хүрэлсүх Ерөнхийлөгч ШХАБ-ын айлчлалд яваа, Л.Оюун-Эрдэнэ өнөөдөр Шанхайгаас ирсэн зэрэг үйл явдлууд ах намынхан мөд эв зүйгээ олж, хурлаа зарлаж чадахгүй нөхцөлд байдалд байна. Гэвч хүсвэл тохироог хоёр цагийн дотор ч хийж болдог.
М.Саян
