ИЗНН-ын хагаралдааныг хөшигний араас удирдаж суугаа Х.Баттулгын улс төр ЕРӨНХИЙЛӨГЧИЙН СОНГУУЛЬ руу чиглэж байна
Ерөнхийлөгчийн сонгуулийг угтсан улс төрийн намуудын хагарал эрх баригч гэлтгүй парламентад суудалтай намуудыг хүртэл бужигнуулж эхэлсэн. Ирэх жилийн Ерөнхийлөгчийн сонгуульд парламентад суудалтай таван намын төлөөлөл нэр дэвшигчээ сойно. Тэдний нэг нь Иргэний зориг ногоон нам.
Ардчилсан нам нэг үе хос тамга, хоёр даргатайгаар улс төрд туушиндаж байсан бол өдгөө “Нара”-гийн гэж нэрлэгддэг ИЗНН тэр залгамж халааг нь үргэлжлүүлж буй.
Тус нам хоёр талд хуралдаж, нэг талд нь намын даргаа хөөж сүр дуулиан болсон бол нөгөө талд хэсэг бусаг нь “Тэдэнд тийм эрх байхгүй” хэмээн мэдэгдээд буй. Хамгийн сонирхолтой нь нөгөө тал гэдэг нь ИЗНН-ын дарга Б.Батбаатарын талынхан.
Бичигдээгүй дүрмийн дагуу намын дарга нь дүрмийн бус хурал хэмээн мэдэгдэж тамгаа хав дарах нь ч тодорхой болсон.
Эх сурвалжийн мэдээлж буйгаар ИЗНН-ын эл дотоод хагарлыг УИХ-ын гишүүн, Ерөнхийлөгч асан Х.Баттулга удирдаж байгаа аж.
Түүний тухайд хэдийгээр Ардчилсан намд нөлөө бүхий хэдий ч нийгэм, олон нийтийн эсэргүүцэл, намын бас бус гишүүдийнх нь дургүйцлээс бол буланд шахуулж, бараг арчигдах замдаа яваа нэгэн. Тиймээс ноён Женко ханцуйн доторх барбарис төлөвлөгөө боловсруулсан нь АН биш ИЗНН-тай тохиролцож Ерөнхийлөгчийн сонгуульд өрсөлдөх хувилбар.
ИЗНН-ын дарга Б.Батбаатарын тухайд хэдийгээр нас нь болсон ч гэсэн Ерөнхийлөгчийн сонгуульд өрсөлдөх хэмжээний амбиц, харизм, манлайлал байхгүй эцэстээ хэн нэгэнтэй тохироо хийх нь бараг тодорхой. Энэ цоорхойг олж харсан Женко хөдөлж эхэлсэн нь энэ аж. Товчхондоо, Б.Батбаатарын эсрэг дуугарч намаасаа хүртэл хөөж байгаа Р.Батболд, С.Батбаатар нарын ард Женко байгаа гэсэн үг.
Ерөнхийлөгч нь зургаан жилийн хугацаатай ганцхан удаа сонгогдоно гэсэн Үндсэн хуулийн заалт өөрт нь үйлчлэхгүй гэж тэд тайлбарлаж яваа аж. Өөрөөр хэлбэл 2019 оны Үндсэн хуулийн дээрх өөрчлөлт Ерөнхийлөгч асан Х.Баттулгыг суудлаасаа буусны дараа хэрэгжиж эхэлсэн учраас үйлчлэхгүй гэнэ.
Ийм мэргэн арга бодож олсон Л.Мөнхбаясгалан, С.Ганбаатар, Ө.Шижир, О.Алтангэрэл тэргүүтэй түүний фракцийнхан хэдийнэ “аян дайн”-даа гарсан бөгөөд цалинтай ээжийн 50 мянгыг 500 мянга болгоно гэх акцийг өөрсөддөө наан Ерөнхийлөгчийн сонгуулийн сурталчилгаанд ханцуй шамалсан юм байх. Шүд байхгүй бол буйлаараа гэгчээр хэрэв Х.Баттулгад боломж олдохгүй бол “босоо” С.Ганбаатар гэх Б хувилбараа ч гаргаад ирж болно. Хэн, хэн нь масстай, үзээтэй кандидатууд. Ялахгүй ч гэсэн санал хуваах, үймүүлэх бүрэн нөөц бололцоо тэдэнд бий. Ерөнхийлөгчийн сонгуулийн бие халаалт хэдийнэ эхэлжээ.
