“УИХ-ын гишүүдийг эгүүлэн татах” хуулийн төслийг өнөөдөр УИХ-ын чуулганаар хэлэлцэнэ

Ерөнхийлөгч У.Хүрэлсүхийн санаачилсан УИХ-ын гишүүнийг эгүүлэн татах хуулийн төслийн хэлэлцэх эсэхийг мягмар гарагт /2026.04.07/ Төрийн байгуулалтын байнгын хорооны хуралдаанаар хэлэлцсэн.  Улмаар хуулийн төслийг хуралдаанд оролцсон 21 гишүүний 14 нь буюу 66.7 хувийн саналаар хэлэлцэхийг дэмжсэн байдаг.

Тэгвэл өнөөдөр УИХ-ын чуулганы хуралдаанаар энэхүү хуулийн төслийг хэлэлцэх юм.

Ерөнхийлөгчийн өргөн барьсан хуулийн төсөлд,

Гишүүн өргөсөн тангаргаасаа няцсан,

Гишүүний ёс зүйн дүрмийг ноцтой болон удаа дараа зөрчсөн,

Гэмт хэрэг үйлдсэн болох нь шүүхийн эцсийн шийдвэрээр тогтоогдсон бол УИХ-ын Ёс зүйн дэд хороо, УИХ-ын нэгдсэн чуулганаар заавал нээлттэй хэлэлцэж, Үндсэн хуулийн Цэцийн шийдвэрээр эгүүлэн татна,

УИХ-ын гишүүн ээлжит чуулганы хуралдааны 70-аас доошгүй хувьд хүрэлцэн ирсэн, ээлжит чуулганы санал хураалтын 70-аас доошгүй хувьд биечлэн оролцсон байх шаардлагатай бөгөөд ирц, санал хураалтад хангалттай оролцоогүй бол эргүүлэн татах үндэслэл болно хэмээн тусгасан билээ.