Муур хар, цагаан байх хамаагүй гагцхүү хулгана л барьдаг байх ёстой!
Төрд шургалсан хулгайч нарын томоохон хэргийг илрүүлэх Б.Энхбаярын халуухан улс төр, ширүүхэн байр суурь савангийн хөөс болон замхарч тэрээр өөртөө арай ахадсан ЗГХЭГ-ын даргаар томилогдоод буй.
Шударга үнэний туйл мэтээр харагддаг, МАН-ын сэлэм эргүүлэгч тэрээр хэнийг ч бай хуулийн махны машинд хийнэ гэсэн үндсэн зарчимтай түүнийг ашиг хонжоо, учир шалтгаангүйгээр ам нээнэ гэж байхгүй гэцгээх нь бий. Ерөнхийдөө ямар нэгэн зорилгогүй, ашиггүй бол ганц үг ган хийж, нэг ч үйлдэл хийдэггүй асар прагматик хүн гэсэн үг. Харин зорилго, чиглэлтэй бол юу ч хийхээс сийхгүй зүтгэж, галд хэн өртөх, булшлагдах нь чухал биш бөгөөд энэ үедээ хүйтэн сэтгэлийг сийгүүлэх шиг болно. Тиймээс ч дээдчүүлд маш хэрэгтэй хүн төдийгүй албан тушаал ахисаар ирсэн нь ч ийм шалтгаантай. Хэн эрх мэдэлтэй байна түүний сэлэмний ир, жадны үзүүр байхад бэлэн зэлэн нэгэн. АН-д түүн шиг нэг хүн байдаг нь Ж.Батзандан юм уу даа.
Парламентад МАН цөөнх байх үед Бүлгийн даргын зөвлөхөөр ажиллаж эхэлснээр улс төрд хөл тавьсан. 2016 онд ХЗДХ-ийн дэд сайдаар ажиллаж албан тушаалын амтыг мэдэрсэн. Хөгжлийн банк, Нүүрсний сонсголыг удирдан зохион байгуулснаар түмэнд танигдаж, нэр алдар нь бадарсан. Шударгын туйл болж харагдахын тулд нам доторх идээ бээр шахагчийн дүрд ч нэг биш удаа тоглосон. Үүнийх нь ашиг тус саяхан гарч ХЗДХ-ийн сайдаас суга дэвшиж, засгийн гал тогоог базахаар болоод байна. Бараг л огцрох дээрээ тулж, авлига албан тушаалын хэрэгт холбогдож, АТГ руу зүглэх байсан нэгэн чухам яагаад эл том суудалд тухлав гэх асуулт.
Түүнийг маш сонирхолтой тохироогоор уг суудалд тухалсан тухай бор шувуу төрийн ордны хонгилоор тэнүүчилж явна. Учир нь МАН-ын хамаг бүдүүн даргын дургүйг хүргэсэн бацаануудын хойдохыг зөвхөн мань Б.Энхбаяр л уншиж чадах учраас түүнийг одоохондоо Монгол төрд хэрэгтэй зайран гэж ах нам үзжээ. Муур хар, цагаан байх хамаагүй гагцхүү хулгана л барьдаг байх ёстой зарчмыг гагцхүү Б.Энхбаяр ичиж эмээхгүйгээр биелүүлж чадах цөс, зоригтой учраас ЗГХЭГ-ын даргаар очоод байна. Хуульч учраас хуулийн өмнө унах хэмжээнд биш гэхдээ хуулийг үнэхээр зөрччихсөн мэт ярьж, итгүүлж чадах хосгүй авьяас түүнийх. Хамгийн ойрхны жишээ Д.Амарбаясгалан, Л.Оюун-Эрдэнэ нарт нялзааж байсан гэмт хэрэг өнөөдөр гэхэд бараг мартагдах тийшээгээ хандаж байна. Хожим нэгэн өдөр хэрэг болбол ахиад сөхөхөд бэлэн, ахиад "шүгэл үлээхэд" бэлэн гэсэн үг.
Гэвч, гэвч ЗГХЭГ-ын дарга гэдэг Ерөнхий сайдаасаа ч их ажил нугалдаг монгол төрийн гал тогоо. Хаа очиж С.Бямбацогттой өмнө нь дарга, цэрэг явж, алхаа гишгээ нийлж явсан учраас бас ч гэж давуу тал үүсэж мэднэ. Бусдаар засагтай холбоотой бүх асуудалд санаа тавьж, мэргэжил арга зүйн зөвлөгөө өгөөд байх чадвар сох дутах болов уу. Үнэндээ хуулийн зах зухтай, ажил албан тушаалаа ашиглан бусдын бөгсийг ухахаас өөр ажил хийж яваагүй хүнд ахадсан алба тушаалыг тэрээр энэ удаад авлаа.
ЗГХЭГ-ын ажлыг самарчихгүй л бол барав. Үгүй ядахдаа хэвлэлийн баггүй л эрхэм шүү дээ.
Г.Мөнгөн
