Г.Баасан: Өнөөдөр бол Монголчуудын сэтгэлд гал асаасан түүхэн өдөр. Энэ нийгэмд хүн бүр үнэт зүйлээ хамгаалж байх ёстой

Өнөөдөр /2026.04.07/ Монголын Ардчилсан намын анхны тугийг мандуулах ёслол боллоо. Тодруулбал, Монголын Ардчилсан намын анхдугаар чөлөөт их хурлын 36 жилийн ойг тохиолдуулан тугийг нь Монголын Ардчилсан холбооны үе үеийн гишүүдийн төлөөлөл, МоАН-ын анхны Ерөнхий нарын бичгийн дарга С.Билэгсайхан, анхны Улс төрийн зөвлөлдөх төвийн гишүүн Ц.Баярмаа, Ц.Цолмон нар мандууллаа.

Монголын ардчилсан холбооны гишүүн Г.Баасан: “1990 оны 2 сарын 18-ны өдөр Монголын ардчилсан холбооны их хурал дээр “Монгол Улсад улс төрийн шинэ хүчин бий болж байна” хэмээн олон нийтэд зарлан тунхагласан. Монголын Ардчилсан нам гэж зарласан. Түүнээс хойш зохион байгуулалтад орж 4 сарын 8-ны өдөр Анхдугаар чөлөөт их хурлаа хийсэн байдаг. Монголчууд бид хэдэн зуун жил амьдарч өдий хүрэхдээ социалист системээс Ардчилсан систем рүү орсон. Тэр үед

 - Монголд бүх зүйл хууль ёсны, шударга ёсны байх,

 -Ард түмэн үүх түүхээ хэнээс ч айхгүй чөлөөтэй ярьдаг байх,

-Дэлхийн хүн төрөлхтөнтэй нээлттэй,

-Монгол хүн итгэл үнэмшилтэй сэтгэл хангалуун сайхан амьдрах тийм нийгмийг авчирахыг зорьж Ардчилсан намынхаа анхдугаар хурлыг хийж байсан. Энэ бол Монголчуудын сэтгэлд гал асаасан түүхэн өдөр байсан. Тэр түүхэн өдрийг бид хойч үедээ дурсан санаж үлдээхгүй бол өөр хэн ч үлдээхгүй шүү дээ. Ер нь аливаа нэгэн түүхийг тэр ард түмэн өөрсдөө л бичдэг тийм ч учраас энэ түүхийг дурсан санаж одоогийн залуус зарлах мэдүүлэх ёстой гэдэг утгаар энэ ёслолыг хийж байна. Ардчилсан нийгэм бол иргэн бүрийн хариуцлагатай нийгэм. Түүнээс биш улс төрийн намд юм уу, нутгийн сайн таньдаг хүүхдэд, эсхүл нэг хөрөнгөтэй хүнд найддаг нийгэм биш. Энэ нийгэм бол хүн бүр үнэт зүйлээ хамгаалж байх ёстой. Эрх чөлөө гэдэг бол ус агаар шиг хэрэгтэй. Шударга ёс бол хүн төрөлхтний хамгийн том үнэт зүйл. Үүний төлөө иргэн бүр цохилох зүрхтэй, дуу хоолойгоо айж ичихгүй гаргадаг бүгд ялгаварлан гадуурхахгүй нэгдэж чаддаг тийм нийгмийг бид байгуулсан гэвч харамсалтай нь өнөөдөр 30 жилийн хугацаанд бүрэн төлөвшиж чадаагүй байна. Гэхдээ цаг хугацааны эрхээр бүх зүйл сайхан болно гэдэгт итгэлтэй байна” гэв.

Монголын Ардчилсан нам байгуулагдсаныг анх Монголын Ардчилсан Холбоо Анхдугаар их хурлаас 1990 оны хоёрдугаар сарын 18-нд олон нийтэд зарлан тунхаглаж байжээ.

Харин 1990 оны 4 дүгээр сарын 7-8-нд Монголын шинэ цагийн улс төрийн хоёр дахь хүчин Монголын Ардчилсан Нам /МОАН/-ын анхдугаар чөлөөт хурал хуралдаж дүрэм мөрийн хөтөлбөрөө батлаж, Улс төрийн зөвлөлдөх төвийн гишүүдээ сонгосон түүхтэй юм.