Монгол улсын Ерөнхийлөгчийн нэрэмжит "ДРОНОКОН-2026" олон улсын тэмцээн зохион байгуулагдана

Монгол улсын ерөнхийлөгчийн нэрэмжит нисгэгчгүй нисэх хэрэгслийн жолоодлогын зүүн азийн бүсийн тэмцээн "DRONECON-2026" нь хоёр үе шаттайгаар зохион байгуулагдана. Тэмцээн нээлттэй зарчмаар явагдах бөгөөд тив, дэлхийн бүх улс орноос тамирчид оролцох боломжтой. Үндэсний шалгаруулалтад шалгарсан тамирчид болон багууд Монгол Улсаа төлөөлөн олон улсын үе шатанд оролцох эрх эдэлнэ.

Тус тэмцээнийг Монгол Улсын Их Хурлын 2020 оны 52 дугаар тогтоолоор баталсан "Алсын хараа-2050" Монгол Улсын урт хугацааны хөгжлийн бодлогын зорилт, мөн Засгийн газрын 2024 оны 209 дүгээр тогтоолоор баталсан нисгэгчгүй нисэх төхөөрөмж ашиглалтын талаар авах арга хэмжээний хүрээнд зохион байгуулж буй бөгөөд цахим хөгжил, инновац, дэвшилтэт технологи, залуучуудын хөгжил болон нисгэгчгүй нисэх хэрэгслийн салбарыг дэмжих зорилттой юм. Тэмцээнд оролцох сонирхолтой мэргэжлийн нисгэгчид, инженерүүд, оюутан залуус болон технологи сонирхогч иргэд dronecon.gov.mn цахим хуудсаар дамжуулан бүртгэлээ хийнэ. Оролцогч нь удирдамжид заасан техникийн шаардлагыг хангасан тоног төхөөрөмжтэй, гэнэтийн ослын даатгалд хамрагдсан байх шаардлагатай.

Ерөнхий зохион байгуулагч: Монгол Улсын Ерөнхийлөгчийн Тамгын газар, Цахим хөгжил, инновац, харилцаа холбооны яам

Хамтран зохион байгуулагч: Батлан хамгаалахын яам, Гадаад харилцааны яам, Зам, тээврийн яам, Соёл, спорт, аялал жуулчлал, залуучуудын яам, Зэвсэгт хүчний Жанжин штаб, Зэвсэгт хүчний Агаарын цэргийн командлал, Онцгой байдлын ерөнхий газар, Төрийн цахим үйлчилгээний зохицуулалтын газар,Иргэний нисэхийн ерөнхий газар, Харилцаа холбооны зохицуулах хороо, Нийслэлийн Засаг даргын Тамгын газар, Нийслэлийн Биеийн тамир, спортын газар, Нийслэлийн Соёл, урлагийн газар, Радио телевизийн үндэсний сүлжээ зэрэг төрийн байгууллагууд, Монгол цэргийн нэгдсэн холбоо, Монголын нисгэгчгүй хэрэгслийн холбоо, Монголын дрон нисгэгчдийн холбоо, MGL FPV Racing клуб, Монголын STEAM Боловсролын Академи,Изинис Эйрвэйз зэрэг нийт 20 байгууллага ажиллаж байна.

Тэмцээний шалгаруулалт нь Ерөнхий ангилал (5" Open Class), Жижиг дроны ангилал (Tiny Whoop), Багийн дроны ангилал (Drone Soccer), Сонирхогчийн дроны уралдаан (Commercial Drone Racing), Дрон кодчилол ба хиймэл оюун ашиглан даалгавар гүйцэтгэх тэмцээн (Coding and AI) гэсэн таван ангилалд явагдах бөгөөд I үе шатанд бүх ангилал, II үе шатанд эхний гурван ангилал зохион байгуулагдана. Тэмцээний удирдамж, дүрэм журам, ангиллын техникийн шаардлага болон бусад дэлгэрэнгүй мэдээллийг dronecon.gov.mn албан ёсны цахим хуудсаар авах боломжтой.

Хаана: Хан-Уул дүүрэгт байрлах Буянт-Ухаа Олон улсын нисэх онгоцны буудалд

Тэмцээний үе шат: үе шат (Үндэсний аварга шалгаруулах тэмцээн) 2026.05.09 – 05.10 өдрүүдэд

II үе шат (Зүүн Азийн бүсийн тэмцээн) 2026.05.30 – 05.31 өдрүүдэд dronecon.gov.mn dronecon.gov.mn