"The MongolZ" ДАШТ-ын хасагдах шатанд шалгарсан Ази тивийн анхны баг болж, түүх бүтээлээ
"PGL Major Copenhagen 2024" буюу CS2 тоглоомын Дэлхийн Аварга Шалгаруулах Тэмцээн (ДАШТ) Дани улсад үргэлжилж байна. Нийт 1.2 сая ам.долларын шагналын сантай тус тэмцээн нь Open stage, Elimination Stage, Playoff Stage гэсэн гурван шаттайгаар энэ сарын 17-31-нд зохион байгуулагдах юм.
Тус тэмцээнд Ази тивийг төлөөлж Монголоос "The MongolZ" баг, Хятад улсаас "Lynn Vision" гэх хоёр баг өрсөлдсөн. Тэгвэл "The MongolZ" өчигдөр түүх бүтээж, ДАШТ-ын хасагдах шатанд шалгарсан Ази тивийн анхны баг боллоо. Тэд Open stage шатанд ОХУ-ын AMKAL, ESPORTS, Хятадын Lynn Vision, Бразилын Legacy зэрэг багийн хожсон юм. Ингэснээр тэд CS2 тоглоомын дэлхийн аваргад Ази тивээс гурван баг оролцох эрхийг авч чадлаа.
