"Мөнгөн мод" наадмын шилдгүүд маргааш тодорно
“Монголын урлаг дэлхийн тайзнаа”, “Монгол өв ба дэлхий дахинд” цогц бодлогын илэрхийлэл болсон соёл, урлагийн салбарын 2023 оны шилдгүүдээ шалгаруулах уламжлалт “Мөнгөн мод” наадмын цом гардуулах ёслол хүндэтгэлийн арга хэмжээ маргааш /2024.03.27/ зохион байгуулагдана.
15 дахь жилдээ зохион байгуулж буй энэ удаагийн "Мөнгөн мод-2023" наадмын хүрээнд үндэсний болон сонгодог орчин үеийн урлагийн төрөл зүйлийг уран сайхан, дүрслэл, ур чадварын өндөр түвшинд бүтээн туурвисан шилдэг 13 бүтээл, тайз, дэлгэцийн бүтээлийг мэргэжлийн өндөр түвшинд гүйцэтгэсэн шилдэг 12 уран бүтээлчид мөнгөн мод цомыг гардуулах юм.
Сонирхуулахад, 1962 оноос хойш жил бүрийн гуравдугаар сарын 27-ны өдрийг "Дэлхийн театрын өдөр” болгон тэмдэглэн өнгөрүүлдэг болсон. Энэ өдөр бол дэлхийн өнцөг булан бүрд буй театрын урлагийн уран бүтээлчид хийгээд театрын урлагийн үнэнч үзэгчдийн баярын өдөр юм.
