“Mongol Made" олон улсын luxury зах зээлд өрсөлдөнө
"М-ойл"-ын тэргүүн хатагтай Б.Пунсалмаа, дээдсийн хүрээнийхний пиарыг базагч Б.Солонго хоёрын үүсгэн байгуулсан “Монгол мэйд” групп 1000 эмэгтэйг ажлын байраар хангаж, монгол савангаар эх орныхоо хэрэгцээг хангана гэх гоё, том амбицтайгаар үйлдвэрээ нээж байв. Үнэхээр ч тэдний үйлдвэрлэж буй монгол малын тосноос гаргаж авдаг органик саван монгол хүүхнүүдийн байнгын хэрэглээ болсон. Сүүлд гаргасан “Монгол гурмэ” брэндийн сүү, цагаан идээ нь Зайсангийн ямбатай эзэгтэй нарын таашаалд нийцэх болсон гэнэ лээ. Тэгвэл энэ удаад тэд монгол хонины ноосыг дэлхийн luxury зах зээлд гаргана гэв ээ. Тодруулбал “Gucci”, “Prada” зэрэг дэлхийн тансаг зэрэглэлийн брэндүүдтэй хамтран ажилладаг Францын Messieurs агентлагтай хамтрахаар болжээ.
Баян айлын эрх эхнэрүүд гоо сайхны салон, кофе шоп хавьцаа эзэн сууж байхад Б.Пунсалмаа овоо том амбицтай мадам гэдгээ харуулж байх шиг. Шарк танкын хойморт залраад авсан тэрээр 2006 оноос “М-Ойл”-ын гүйцэтгэх захирал, 2019 онд өөрийн нэрээр сан нээж, 2020 онд УИХ-ын сонгуульд АН-аас нэр дэвшиж, 2021 онд “Mongol made”-ээ үүсгэн байгуулж байжээ. Түүний бизнес хамтрагч Б.Солонгын тухайд “Profile communications” пиар агентлагийн захирал, харилцааны стратегичээр бэлтгэгдсэн цөөн мэргэжилтний нэг гэгддэг.
Савангаас ноос ноолуур хүртэл амбиц, карьераа олон улсад тодорхойлж яваа хоёр хатагтайд амжилт хүсье.
