“Хайрыг хайрла”-ыг өнөөдөр, маргааш тоглоно
1984 онд Төрийн шагналт, Соёлын гавьяат зүтгэлтэн Д.Батбаяр, найруулагч И.Нямгаваа нар нэгэн “бөмбөг тэсэлсэн” нь “Хайрыг хайрла” жүжиг байлаа. Тухайн үед Улсын хүүхэд, залуучуудын театрын захиалгаар Д.Батбаяр эл жүжгийн зохиолоо бичиж, залуу уран бүтээлчид түүнийг нь амилуулснаар үзэгчдийн хөлд дарагдаж байв. Эл жүжгийнхээ талаар Д.Батбаяр “Энэ жүжигтэй холбоотой олон сайхан дурсамж бий. Зохиолтойгоо танилцсаны дараа найруулагч И.Нямгаваа нэг өдөр “Туулын дүрд энэ охин яг тохирно. Танд ямар санагдаж байна вэ” гээд Н.Долгорыг дагуулаад ирсэн. Тэр үед Н.Долгор Улсын хүүхэлдэйн театрт үйлчилгээний ажилтан байсан юм. Ингэж тэрбээр мандаж эхэлсэн юм шүү дээ” хэмээн дурссан нь бий.
“Хайрыг хайрла” жүжиг залуу гэр бүлийн дотоод зөрчлийг ил гаргаж, тухайн үедээ нийгмийг ёстой л нэг донсолгож, цахиур хагалсан сайн бүтээл байсан хэдий ч сүүлийн үеийн залуус энэ тухай бараг мэдэхгүй, мартагдахад хүрээд байсан юм. Тэгвэл эл уран бүтээлээр Улсын хүүхэд, залуучуудын театр 27 жилийн дараа хөшгөө нээлээ. Жүжгийн ерөнхий найруулагчаар Төрийн соёрхолт, Урлагийн гавьяат зүтгэлтэн Н.Наранбаатар, продюсероор Гавьяат жүжигчин Н.Ариунболд, уран сайхны удирдагчаар Ардын багш, Урлагийн гавьяат зүтгэлтэн Н.Ганхуяг, ерөнхий зураачаар Л.Батбилэг нар ажиллажээ. Гол дүрүүдэд Ч.Авирмэд, Ц.Мөнх-Эрдэнэ, Д.Оюунтуул, Т.Золжаргал, Х.Азбуян, Н.Бямбасүрэн, Г.Алтангэрэл, А.Оргил, Э.Уранжаргал, Б.Тэгшжаргал нар болон Улсын хүүхэд, залуучуудын театрын уран бүтээлчид оролцон тоглож байна.
Нөхөр нь эхнэрийнхээ хардалт, үл итгэлцлээс болж гэрээсээ явж буйгаар жүжиг эхэлдэг. Тэдний хувьд асуудлыг шийдэх хамгийн амархан арга бол салалт. Гэхдээ тэд зөв алхам хийж буй эсэхдээ эргэлзэнэ. Тэд зовлон жаргалыг хамтдаа туулж ирсэн хэрнээ жижигхэн асуудлаас ямар том асуудал үүсгэж, эцэстээ юу тохиолдож болохыг "Хайрыг хайрла" уянгын драмын жүжигт харуулна. Түүнчлэн гэр бүл, хосуудын харилцаа, хайр дурлал, итгэлцлийн талаар өгүүлэх энэхүү жүжиг нь хором бүрт зөв эргэлт, зөв сонголт хийхийг уриалахаас гадна бүх насныхан үзэх боломжтой. Тус уран бүтээлийг өнөөдөр, маргааш Улсын хүүхэд, залуучуудын театрт тоглоно.
