Их Британийн супер модель Наоми Кэмпбеллийн төрсөн өдөр тохиож байна
Өнөөдөр дэлхийн хамгийн алдартай загвар өмсөгчдийн нэг Наоми Кэмпбелл 54 нас хүрч байна. Наоми Кэмпбелл Английн Лондон хотод төржээ. Түүнийг эхийнхээ хэвлийд байхад аав нь хаяад явсан тул Наоми аавыгаа огт хараагүй аж. Тэрбээр анх 15 настайдаа загварын тайзан дээр гарчээ. Өдгөө ч тайзаа эзэгнэсэн хэвээр буй.
“Моделийн замыг сонгож авахад өдий зэрэгт хүргэсэнд талархах ёстой хүн байдаг. Тэр бол Бетт Болт. Тэр намайг анзаарч зураг авалтад урьсан юм. Хэрвээ Бетт байгаагүй бол би хэзээ ч фото модель болохгүй байсан. Би эмч болох байлаа. Гэвч хувь тавилан өөрөөр эргэж “Хар ирвэс” болоод байна даа” хэмээн нэгэн ярилцлагадаа дурджээ. Тэрбээр загварын ертөнцийн “Хар ирвэс”, “Мисс шоколад”, “Шөнийн хатан хаан” юм.
1985 онд 15 настайдаа алдарт “Elle” сэтгүүлийн зураг авалтад оролцжээ. Энэхүү сэтгүүлийн нүүрэнд гарсан хар арьст анхны модель байв. Тэрбээр зөвхөн загварын тайзан дээр алхдаггүй, олон төрлийн авьяастай. Тухайлбал, 1995 онд эхний бөгөөд эцсийн цомог болох “Babywoman”-гаа гаргасан. Энэ цомог Японд их амжилт олсон ч АНУ, Их Британид бараг зарагдаагүй юм. Түүнчлэн 20 гаруй кинонд туслах дүрд, мөн тооны клипэнд голлох дүрд тогложээ. 2020 онд “Taschen” хэвлэлийн газар Наоми Кэмпбеллийн тухай “Naomi” нэртэй ном гаргажээ. Тус номонд загвар өмсөгчийн 30 жилийн карьер дахь шилдэг зураг авалтуудыг багтаасан байна. Тэр дунд Хельмут Ньютон, Стивен Мейзел, Эллен фон Унверт, Питер Линдберг, Паоло Роверси, Жан-Поль Гуд болон бусад алдартай гэрэл зурагчдын бүтээлүүд бий. Зураг авалтуудын зэрэгцээ номонд Наоми өөрийн ажлын талаарх дурсамжуудыг өгүүлсэн бөгөөд ингэхдээ тэрбээр Карл Лагерфельд, Аззедин Алайя болон Жанни Версаче зэрэг агуу дизайнеруудыг санан дурссан байдаг.
