WHO is WHO: Реппер Desant гэж хэн бэ
Монголын хип хоп урсгалын томоохон төлөөлөгчдийн нэг реппер Desant ирэх зургаадугаар сарын 8-нд “Big fish” нэртэй бие даасан тоглолтоо Төв цэнгэлдэх хүрээлэнд хийхээр болсон билээ.
Түүний тухай сонирхолтой баримтуудыг хүргэе.
- Реппер Desant буюу Г.Батболд нь Завхан аймгийн Яруу суманд төрсөн, Улаанбаатар хотын 16 дугаар сургуулийг төгссөн.
- Тэрбээр алдарт реппер Tupac-ын дуунуудыг сонсоод хип хоп урсгалд дурлаж байсан гэдэг.
- Түүний багадаа авч байсан хамгийн сайхан бэлэг нь ааваараа авхуулсан унадаг дугуй нь.
- Долдугаар ангиа төгсөөд зуны амралтаараа ажил хийж, анхны цалингаа авчээ. Энэ цалингаараа хичээлийн хэрэглэлээ бэлдэж, бас хип хоп хувцас авч байсан гэнэ.
- 17 настайдаа дөрвөн найзтайгаа хамт “Gangsta service” нэртэй хамтлаг байгуулжээ. Улмаар “Click click boom” бүлгийн гишүүн болж, ганцаарчилсан уран бүтээлээ туурвиж олны танил болсон.
- Desant бие даасан анхны тоглолтоо 2014 онд хийсэн.
- “Дижитал” хамтлагийн 15 жилийн ойн тоглолтын үеэр Э.Дэлгэрмөрөнтэй танилцсанаар “Тоонот” хөгжмийн компаниа хамтран байгуулсан байна.
- Өөрийнхөө уран бүтээл бүртээ хайртай ч “4.12” дуугаа хамгийн күүл болсон гэж боддог.
- Түүний уран бүтээлүүдээс хамгийн богино хугацаанд бүтсэн нь “Захидал” дуу. Дууны аяыг реппер Lil Thug E түүнд 2016 онд өгч байжээ. Сүүлд архиваа ухаж байхдаа тэр аяыг олоод шууд үгээ бичин, Jason-той хамт дуулсан. Бараг 30 минутийн дотор бүтээсэн дуу гэнэ.
- Хамгийн их сонсдог буюу машиндаа байнга авч явдаг CD-нүүд нь old school хип хоп. Tupac, Biggie, NWA зэрэг тэр үеийн хөгжим цаанаа л дотно санагддаг гэнэ.
- Продюсерын хувьд, үлгэр дууриал авдаг хүн нь Dr.Dre.
- Тэрбээр нээлттэй хүн биш. Ялангуяа хувийн амьдралаа бусдад дэлгэх дургүй. Харин хэлмээр зүйлсээ дуугаараа илэрхийлдэг.
- Чөлөөт цагаараа кино үзэх дуртай. Жүжигчин Том Хардигийн тоглосон кинонууд, мөн бодит түүхэн буюу намтарчилсан кино, баримтат кино, бас хөгжмийн кинонуудыг их үздэг гэнэ.
- Хип хоп урлаг түүнд эрх чөлөө олгодог. Өөрийнхөөрөө байх, уран бүтээлээрээ дамжуулан хүссэнээ илэрхийлэх орон зайг олгодог гэжээ.
