Жүжигчин, продюсер Киллиан Мерфи өнөөдөр 48 нас хүрч байна

Киллиан Мерфи 1976 оны 5-р сарын 25-нд Ирландын Корк мужийн Дуглас хотод мэндэлжээ. Түүний аав төрийн албан хаагч, ээж нь франц хэлний багш. Тэрбээр Корк мужийн Баллинтемпл хотод Пайди, Сеал, Орла гэх дүү нарынхаа хамт өсжээ. 10 настайгаасаа дуу бичиж, тоглож эхэлсэн бөгөөд католик сүмийн ахлах сургуульд суралцаж байх үеэсээ урлагийн үйл ажиллагаанд идэвхтэй оролцож эхэлжээ. Уг нь англи хэлний багш нь түүнд жүжигчний мэргэжлийг санал болгосон ч тэрбээр рок дуучин болохоор шийдсэн гэдэг. Өсвөр насандаа тэрбээр “The Beatles”-ийн шүтэн бишрэгч байсны зэрэгцээ хэд хэдэн хамтлагт дуулж, гитар тоглож явсаар “The sons of Mr.Green Genes” хамтлагаа байгуулжээ. “Jazz records” тэдэнд таван цомгийн санал тавьсан ч хөвгүүд мөнгийг нь голж гэрээ хийхээс татгалзсан байдаг.

Киллиан Мерфи 1996 онд Коркийг их сургуульд хуулийн чиглэлээр суралцаж эхэлсэн ч эхний жилээ дуусгаад л хаясан. Учир нь тэрбээр найруулагч Кирнаны “A clockwork orange” тайзны бүтээлийг үзээд жүжигчин болохоор шийдсэн аж.

Тэрбээр 1998 онд “”Sweety Barrett” кинонд анхны гол дүрээ бүтээж байв. Тэрбээр “Хэн гэдэг найруулагч надад хэлснийг санахгүй юм. Гэхдээ тэрбээр жүжигчин болохын тулд гучин жилийн хөдөлмөр шаардлагатай гэж надад хэлж билээ. Би хорь гаруй жил кинонд тогложээ. Дахиад арван жилийн дараа л жинхэнэ жүжигчин болно гэж найдаж явна даа” хэмээсэн юм. Энэ хугацаанд тэрбээр 70 шахам дэлгэцийн уран бүтээлийн гол болон туслах дүрд тогложээ.

Киллиан Мерфи 1996 онд рок хамтлагийнхаа тоглолтын үеэр Ивонна МакГиннестэй танилцан үерхэж, улмаар 2004 онд тэд гэрлэжээ. Тэднийх хоёр хүүтэй. Хувийн амьдралаа нууцалдаг Киллиан Мерфи алдартны дүр эсгэдэггүй, улаан хивсний ёслолуудыг ойшоодоггүй. Тэрбээр жүжиглэхээс бусад амьдралынхаа талаар ярихгүй байхыг илүүд үздэг. 2010 онд Перриерийн шагнал гардуулах ёслолыг сурталчлах зорилгоор Ирландын “Late Late” шоуны зочноор оролцох хүртлээ ямар ч телевизийн ток шоунд оролцдоггүй байв.