Өнөөдөр жүжигчин Т.Энэрэлийн төрсөн өдөр
Дэлгэцэнд мөнхөрсөн, кино урлагийн “алтан үе”-ийн уран бүтээлчдийн үр хүүхэд, ач зээ нар авьяас, мэргэжлийг нь өвлөж яваа жишээ олон. Тэдний нэг нь жүжигчин Т.Энэрэл. Түүний өвөө нь “Хөхөө гэрлэх дөхлөө”, “Түмний нэг”, “Салхины амт” зэрэг кино, 60 орчим жүжгийн гол болон туслах дүрд тоглож, “Сахиуст цэрэг” жүжгийн зохиол бичиж, найруулсан Б.Дашдаваа агсан юм. Тэрбээр өвөөгийнхөө талаар “Хүүхэд байхаасаа л өвөөгийнхөө тоглосон кинонуудыг үзэж өссөн, Гэхдээ би жүжигчин Б.Дашдаваагийн ач охин гэж хэлэхээсээ эмээдэг” гэсэн.
Жүжигчин Т.Энэрэл СУИС-ийг 2010 онд төгссөнөөсөө хойш Төв аймгийн “Монгол туургатан” театраар овоглосон. Ингэхдээ театрын анхны дүрээрээ л буюу “Миний чинь зоригт бяцхан найз” хүүхдийн жүжгийнхээ дүрээр “Гэгээн Муза” олон улсын театрын наадмын шилдгээр тодорч байв. Оюутан ахуйдаа “Амилсан хайр”, “Хайрын бэлэг” гэхчилэн дэлгэцийн уран бүтээлд тоглож, театрын босго давсныхаа дараа ч МҮОНТ-ийн “Амьдрал чиний төлөө”, “Боловсрол” телевизийн “Гурван найз”, “Хайр эргэсэн хавар” олон ангит, мөн “Админ Зэт”, “Эцсийн зогсоол Э цэг”, “Алтан судал”, “Seasons of love” кинонд ажилласан бол хамгийн сүүлд “Сүрэг”, “Шар гэгээ” уран сайхны киногоор үзэгчидтэй “уулзсан” юм. Харин тайзны уран бүтээлийн хувьд “Pro” театрынхны хүргэсэн Виктор Хюгогийн “Инээмтгий хүн” визуал драмын жүжгийн гол дүр Дея, Александр Дюмагийн “Шадар гурван цэрэг” физикл драмын жүжгийн Констанция Бонасьегийн дүрээр тайзнаа гараад буй.
