Австралийн жүжигчин Крис Хемсворт Холливуудын өргөн чөлөөнд алдрын одтой боллоо

Алдарт "Marvel"-ын супер баатруудын нэг Thor-ын дүрээр алдаршсан Австралийн жүжигчин Крис Хемсворт Холливуудын өргөн чөлөөнд алдрын одтой боллоо.

Крис Хемсворт 1983 онд Австралийн Мельбурн хотод төрсөн бөгөөд 2002 оноос уран бүтээлийн гараагаа эхэлжээ. Түүнийг Холливуудын од, авьяаслаг жүжигчин, серфингийн хорхойтон, сайхан залуу, халамжтай эцэг гээд маш олон янзаар тодорхойлж болно.

Тэрбээр 2007 онд төрөлх хотоо орхин Холливуудад нүүн иржээ. Эхэндээ бусад залуу жүжигчдийн адил сонгон шалгаруулалтуудаар хэсэж, өөртөө тохирох дүрийг олтол уртхан замыг туулсан байдаг.

Сонирхолтой нь, тэрбээр "Marvel"-ын алдарт супер баатрын дүрийг өөр жүжигчинд бараг л алдах шахсан гэдэг. Учир нь сонгон шалгаруулалтын үеэр Крис сандарч, дүрийнхээ текстийг хүссэнээрээ уншиж чадаагүй гэдгээ ярилцлагадаа дурдаж байсан удаатай. Азаар түүний төгс гэж хэлж болох гаднах төрх, мөн киноны уран бүтээлчдэд их цалин шаардахааргүй залуу жүжигчин хэрэгтэй байсан нь Крис Хемсвортыг домогт гардаг шуурганы бурхан гэгдэх Торын дүрийг өөрийн болгоход нь тусалжээ.

Тэрбээр дэлхий даяар олон шүтэн бишрэгчтэй супер баатрын дүрээс гадна "Formula 1"-ийн домогт нисгэгч Жеймс Хантын дүрийг Рон Ховардын найруулсан "Rush" нэртэй намтарчилсан кинонд бүтээгээд амжсан. Мөн өөрийн тэсвэр тэвчээр, жүжигчний ур чадвараа Рон Ховардын "In the heart of the sea" кинонд дахин харуулж чадсан юм. 

Өнөөдрийг хүртэл Крис Хемсворт 50 шахам уран сайхны киноны гол болон туслах дүрд тоглоод байна.