Өмнөд Солонгосын од Yoona энэ өдөр мэндэлжээ

Дуучин, бүжигчин, жүжигчин, 2007 оноос “Girls generation” хамтлагаараа олны танил болсон Yoona буюу Им Юн А өнөөдөр 34 нас хүрч байна. Тэрбээр Өмнөд Солонгосын Сөүл хотод төржээ. 2002 онд тэрээр “SM Saturday” нээлттэй сонгон шалгаруулалтад оролцож сонгогдсон бөгөөд таван жил дуулж бүжиглэх, жүжиглэх чиглэлээр бэлтгэгдсэн байна. Ингээд 2007 оны 8-р сард албан ёсоор “Girls generation” хамтлагийн гишүүнээр орж дебютээ хийсэн байдаг.

Гэхдээ дебютээ хийхээс өмнө тэрбээр нэлээд олон клип, зар сурталчилгаанд тоглож  байв. Тухайлбал, хамгийн анх 2004 оны 12-р сард TVXQ хамтлагийн “Magic castle” дууны клипэнд тоглосон байна.

2007 оноос Yoona “Girls generation” хамтлагийн уран бүтээл, тоглолтуудын хажуугаар кинонд тоглож эхэлсэн байна. Хамгийн анх MBC телевизийн “Two outs in the ninth inning” зэрэг гурван ч цувралд туслах дүр бүтээжээ. Түүний дараа KBS телевизийн “You are my destiny” цувралын гол дүрд тоглосноор түүний жүжигчний карьер дардан болсон юм. Эл дүрээрээ “KBS drama awards”-аас шилдэг шинэ жүжигчний шагнал ч хүртсэн байна. Өнөөдрийг хүртэл Yoona телевизийн 10 гаруй цувралын гол дүр, бүрэн хэмжээний 10-аад уран сайхны киноны гол дүрд тоглоод байна.