“Prison break” цувралаараа нэр алдарт хүрсэн Уэнтуорт Миллер өнөөдөр 52 нас хүрч байна

Америкийн “Фокс” телевизээр гарч үзэгчдийг байлдан дагуулсан “Prison break” буюу “Шоронгийн сүйрэл” олон ангит киноны хамгийн ухаалаг дүр болох Майкл Скофиелдын дүрийг бүтээсэн жүжигчин Уэнтуорт Миллер 1972 оны энэ өдөр Английн Оксфорширт Чиппинг Нортон гэдэг газар төржээ. Багш ээж, хуульч аавтай тэрбээр гурван хүүхэдтэй айлын ганц хүү.

Тэрбээр 1995 онд Америкийн нэр хүндтэй, чансаа өндөртэй сургуулиудын нэг болох Принстоны их сургуулийг дүүргэсэн байна. Эл сургуульд суралцаж байхдаа тэрбээр “Стинки” буюу “Муу жаал” гэдэг хочтой байсан байна. Учир нь тэрбээр маш оюунлаг оюутан байсан учраас найзууддаа дандаа хатуухан үг хэлчихдэг байснаас ийм хочтой болсон гэнэ. Чөлөөт цагаараа ном шагайдаг, ном уншаагүй үедээ дуу дуулах хоббитой. Оюутан байхдаа сургуулийнхаа “Tigertones” хамтлагт баритон хоолойгоор дуулдаг байж.

Их сургуулиа утга зохиолын чиглэлээр төгссөнийхөө дараа тэрбээр жүжигчин болохоор шийдэж Лос Анжелес хот руу нүүжээ. Уэнтуорт Миллер уран бүтээлийн гараагаа ABC телевизийн “Dinotopia” мини цувралд 2002 онд тоглож эхлүүлсэн. Үүний дараа 2003 онд “The human stain” кинонд алдарт жүжигчин Энтони Хопкинсын залуу насны дүрд тоглосноор Холливуудын найруулагч нарын хараанд өртөж эхэлжээ. Тэр цагаас хойш 30 гаруй бүрэн хэмжээний уран сайхны кино болон олон ангит киноны гол дүрд тоглосон байна.