“Фантастик” продакшн 16 нас хүрлээ
Үзэгчдийн дуртай дэлгэцийн олон уран бүтээлийг туурвисан “Фантастик” продакшны 16 жилийн ой тохиож байна. Тус продакшныг 2008 онд нэгэн үеийн найзуудын санаачилга, тэдний хүсэл мөрөөдлийн нэгдлээр байгуулсан юм. Өдгөө тус продакшн нь захирал, продюсер Б.Батсайхан, найруулагч Б.Тамир, жүжигчин Э.Алдар, М.Баярбат, Ж.Алтаншагай, Б.Барслхагва, Б.Ганчулуун, Э.Одбаяр нарын бүрэлдэхүүнтэйгээр уран бүтээлээ туурвиж байна.
2008 оноос хойш өнөөдрийг хүртэл “Фантастик”-ийнхан “Дурсамж төгсгөл үгүй”, “Амингоо”, “Аз жаргалын шок”, “Миний ах атаман”, 247 градус” “Хар сувдны нууц”, “Маш нууц”, “Том толгойтын романс”, “18 нас, би чамд хайртай”, “Зүрхний хилэн”, “Маш нууц-2: Байтаг Богд”, “37 дугаар точка”, “Зура”, “Зура-2: Цурам ажиллагаа”, “Зура-3: Цэвэрлэгээ” зэрэг богино болон бүрэн хэмжээний уран сайхны кино, мөн олон ангит киног бүтээж үзэгчдэд хүргэжээ.
Монголын кино театруудын менежментийн холбооноос 2017 оноос өнөөдрийг хүртэлх хамгийн шилдэг борлуулалттай кинонуудыг жагсаахад "Фантастик" продакшны "Зура-3: Цэвэрлэгээ" уран сайхны кино тэргүүлсэн байна. Мөн тус продакшны "Зура-2: Цурам ажиллагаа" уран сайхны кино жагсаалтын гуравдугаарт, "Маш нууц: Байтаг богд" уран сайхны кино дөрөвдүгээрт, "Зүрхний хилэн" уран сайхны кино долдугаар байрт мөн эрэмбэлэгджээ.
Эдүгээ олон мянган үзэгчдэдээ хүргэсэн уран бүтээлүүдийн гол амин сүнс нь урлагийн төлөө нэгэн сэтгэлтэй хөдөлмөрлөж чаддаг эрч хүчтэй залуусын хичээл зүтгэл юм. “Фантастик”-ийнханд ойн баярын мэнд хүргэе.
