WHO is WHO: Жүжигчин А.Туяа гэж хэн бэ
Жүжигчид дундаас нуруулаг, царайлаг, авьяаслаг, спортлог гээд олон сайхан шинжийг өөртөө агуулсан бүсгүй бол А.Туяа. “Х-ТҮЦ” продакшнаас уран бүтээлийн гараагаа эхэлж, өдгөө үзэгчдийн эчнээ мэдэх жүжигчин болсон түүний тухай сонирхолтой баримтуудыг хүргэе.
- А.Туяа 1985 оны 3-р сарын 31-нд Улаанбаатар хотод төржээ.
- Нийслэлийн 62-р сургуулийг төгссөн. Улмаар СУИС-ийн жүжигчний ангид тэнцэж, Ардын жүжигчин Э.Лхамхүүгийн шавь болсон. “Central” телевизийн захирал Г.Анхбаяр, “Эмоци” продакшны жүжигчин О.Тэмүүжин, “Fantastic” продакшны жүжигчин Э.Алдар нартай нэг анги.
- Түүний аав нь геологич, ээж нь нягтлан. Эцэг, эхээс 4-үүлээ бөгөөд эгч, хоёр дүүтэй. Гэр бүлийнхэн дунд нь урлагийн хүн байхгүй.
- Багадаа их даруухан охин байсан түүнийг жүжигчин болсонд хамаатнууд нь хүртэл гайхдаг байсан гэдэг. Гэхдээ А.Туяа багаасаа л сургуулиас зохион байгуулдаг урлаг, спортын бүх л арга хэмжээнд оролцдог идэвхтэй охин байжээ.
- Дунд сургуульд байхдаа дээд ангийнхаа охины гуйлтаар “Үнсгэлжин” наадамд оролцож, загварын тайзнаа анх гарсан. Түүнээс хойш цөөн хэдэн удаа загварын шоунд оролцож байжээ.
- Оюутан байхад нь загварын шоу, миссийн тэмцээнд оролцох санал ирдэг байсан ч хүлээж аваагүй. Шалтгаан нь олны нүдэнд өртөж, хэл амны бай болохоос эмээдэг байсан гэнэ.
- Спортод дуртай. Тэр дундаа сагсан бөмбөг давгүй тоглочихдог.
- Түүний шүтдэг жүжигчин нь О.Энхтуул аж.
- А.Туяа СУИС-ийн төгсөх дамжааны оюутан байхдаа ажил, амьдралын гараагаа “Х-ТҮЦ” продакшнаас эхлүүлсэн. Хэсэг хугацаанд продакшнаасаа тусдаа байсан ч энэ оны 3-р сард “Showtime” тоглолтоор эргэн продакшныхантайгаа хамт тайзнаа гарсан.
- Түүнийг олон нийтэд илүү таниулсан бүтээл бол мэдээж “Single ladies” цуврал. Тэрбээр эл киноны анхны ангид 2013 онд тоглож, түүнээс хойш 2015 онд “Single ladies-2”, 2017 онд “Single ladies-3”, 2020 онд “Single ladies-4: Төгсгөл ба эхлэл”, 2023 онд “Single ladies-5: Сүйт бүсгүй” гэхчилэн ангиудын гол дүрд тоглосон.
- Өнөөдрийг хүртэл А.Туяа “Дундын бүсгүй” драмын жүжиг, “Амьдрал нулимсанд дургүй” уран сайхны кино, “Дуудлагын хов базагч” контент гэхчилэн тайз, дэлгэцийн уран бүтээлийг хослуулан ажиллаж байна.
- Нэгэн ярилцлагадаа хайрыг “Хайр бол гоёмсог сайхнаар нүдэнд харагдавч гарт баригддаггүй солонгын долоон өнгө” гэж хэлж байжээ.
