Дэлхийн гран при болон гранд слам тэмцээн өнөөдрөөс эхэллээ
Нийслэлийн Засаг даргын Тамгын газар, Монголын 3x3 сагсан бөмбөгийн холбоо хамтран Улаанбаатарын “Урбан” фестивалийн хүрээнд “Эмэгтэйчүүдийн дэлхийн гран при” болон “Улаанбаатар дэлхийн их дуулга” тэмцээнийг өнөөдрөөс энэ сарын 9-нийг дуустал Д.Сүхбаатарын талбайд зохион байгуулна.
Эмэгтэйчүүдийн дэлхийн гран при тэмцээнийг зургаадугаар сарын 6-7-ны өдрүүдэд зохион байгуулах юм. Тус тэмцээнд Австри, Украйн, Хятад болон Монгол Улсын шигшээ тэргүүтэй найман баг өрсөлдөнө. Монгол Улсаас үндэсний шигшээ баг болон “U23” хүртэлх насны шигшээ баг оролцоно.
Харин зургаадугаар сарын 8-9-ний өдрүүдэд Монгол Улсад 3x3 сагсан бөмбөгийн мэргэжлийн хамгийн нэр хүндтэй тэмцээн болох дэлхийн их дуулга тэмцээн “Улаанбаатар дэлхийн их дуулга” нэртэйгээр зохион байгуулагдах гэж байна. Уг тэмцээнд дэлхийн чансааны эхний арван байр дотор эрэмбэлэгддэг дэлхийн шилдэг мэргэжлийн багууд болох Серби Улсын “ҮБ”, АНУ-ын “Майами”, Нидерланд Улсын “Амстердам”, Литав Улсын “Раудондварис” баг болон Монгол Улсын “Улаанбаатар ММС Энержи”, “Сансар”, “Завхан Сайнскор” тэргүүтэй 12 баг өрсөлдөнө.
Манай “Сансар” багийн бүрэлдэхүүнд А.Ананд эргэж тоглох юм. Түүний хувьд Хятадын “Шанхай” багтай гэрээ байгуулж, Вьетнамын цувралд тэмцээнд орсон. Улмаар “Сансар” багт А.Ананд, М.Өлзий-Орших, Н.Мөнхчөдөр, О.Энхбаатар нар тоглохоор болжээ. Харин “Улаанбаатар ММС Энержи” багт Д.Дэлгэрням, Э.Дөлгөөн, Стив Сер, Ц.Отгонжаргал нар байгаа бол “Завхан Сайнскор” багт Б.Энхсайхан, Э.Цэрэнбаатар, Н.Батбаяр, Н.Ганбаатар нар багтжээ.
