Монголын 21 уран бүтээлч НордАрт олон улсын үзэсгэлэнд шалгаран, оролцож байна
ХБНГУ-ын Бюделсдорф хотноо НордАрт олон улсын дүрслэх урлагийн 25 дахь удаагийн үзэсгэлэн нээлээ. Европт жил бүр зохион байгуулдаг, орчин үеийн урлагийн хамгийн том, нэр хүндтэй үзэсгэлэнгүүдийн нэг НордАрт нь 25 жилийнхээ ойг бүх шагналтан, уран бүтээлчдээ онцгой хүндэтгэл илэрхийлж, тусгай төслүүдийнхээ хамтаар өргөн тэмдэглэж байгаа ажээ. Жил бүр НордАрт дэлхийн өнцөг булан бүрээс 3000 гаруй уран бүтээлчийн материалыг хүлээн авч, 200 гаруй уран бүтээлчийг сонгон шалгаруулдаг уламжлалтай.
НордАрт-ын ерөнхий куратор Вольфганг Грамм энэ жилийн үзэсгэлэнгийн онцлогийг тодорхойлохдоо “Үл үзэгдэх газар хөдлөлт мэт урлаг нь нийгмийн чичиргээг үнэн зөвөөр илэрхийлдэг. Энэ нь хүн төрөлхтний үнэн бодит байдал, хүсэл мөрөөдөл, зөн совингийн тусгал юм. Дэлхийн өнцөг булан бүрээс цугларсан уран бүтээлчид маань нэгдэн, өнгөрсөн цагийн туршлагаасаа ирээдүйн мөрөөдлийг биелүүлэх замдаа гарчээ. Тэд өнгөрсөн үеийн археологичид шиг эрэл хайгуул хийж, орчин үеийн нийгмийн хөгжлийг судлан, шинэ найдвар төрүүлэх эерэг орон зайг бий болгодог“ хэмээн тэмдэглэжээ.
Монголын орчин үеийн урлагийг анх 2015 онд НортАрт-д танилцуулснаас хойш өнөөг хүртэлх 10 жилийн хугацаанд Монголын уламжлал, нүүдлийн соёлын үнэт зүйлс, орчин үеийн урлагийн тод хослол нь НордАрт-ын үзэгчдийн анхаарлыг татсаар ирсэн байна. Өнөө жил Монгол Улсын 5 дахь удаагийн бие даасан павильонд 21 монгол уран бүтээлчийн шинэлэг, өвөрмөц бүтээлүүдийг энэ оны аравдугаар сарын 6-ныг хүртэл толилуулах юм.
